Urola Eskubaloi taldeak sagardo festa antolatu du asteburu honetarako. Ostiralean eta larunbatean Gipuzkoako zortzi sagardotegitako sagardoa eta euskal baserrietako produktuak dastatu ahal izango dira Zumarragako Zelai Arizti pilotalekuan. Lloret de Mar-eko (Herrialde Katalanak) eskubaloi txapelketara joateko erabiliko dute festan aterako duten dirua.
Urola eskubaloi taldekoek karpa erraldoi bat muntatuko dute Zumarragako Zelai Arizti pilotalekuan, festa hau egin ahal izateko. Karparen ateak ostiralean irekiko dituzte, 19:00etan. Larunbatean, 12:00etan irekiko dute.
Gipuzkoako zortzi sagardotegitako sagardoa eta Kalitatea zigilua duten produktuekin prestatutako platerak eta errazioak dastatu ahal izango dira: oilaskoak, txorixoa, hanburgesak, saltxitxak, solomoa, entsaladak… Sagardo botilak 4 euroan salduko dituzte eta errazioak 10 euroan.
Jan-edanarekin batera, hainbat ekintza prestatu dituzte. Ostiralean bertso-afaria egingo dute herriko bertsolariekin eta larunbat arratsaldean, berriz, mus txapelketa jokatuko da.
Txapelketa hau Laket tabernaren laguntzarekin antolatu dute. 16:00etan hasiko da, baina parte hartu nahi dutenek, 15:30ean egon beharko dute karpan. Bikote bakoitzak 20 euro jarri beharko ditu, izena ematerako orduan.
Lau sari banatuko dira. Irabazleek bildutako diruaren %50a, txapela eta garaikurra jasoko dute, bigarrenek diruaren %30a eta garaikurra, hirugarrenek diruaren %20a eta laugarrenek hiru sagardo botila.
Urolaren eskubaloi taldeak lehenengoz antolatu du sagardo festa. Bi urtean behin taldeko haurrak, kadeteak eta gazteak Lloret de Mar-eko eskubaloi txapelketara joaten dira eta festa bidaia hori ordaintzeko antolatu dute.
Jon Mendia klubeko kideak sagardo festaren nondik norakoak azaldu ditu. «Zer edo zer antolatu nahi genuen eta garagardo festak behera egiten ari zirela esan ziguten. Txotx garaia denez, sagardo festa antolatzea erabaki genuen».
Tradizio handiko taldea
Urolak bederatzi talde eta 150 bat jokalari ditu. Tradizio handiko kluba da: aurten 39 urte beteko ditu. Mendia «gustura» dago taldearen azken urteotako ibilbidearekin. «Mutil eta neska askok jokatzen dute eskubaloian eta lehen taldea laugarren doa. Lehenengo biek igoera fasea jokatuko dute eta gure helburua bi lehenengoen artean sailkatzea da».
Gainera, urte hauetan guztietan Urola taldeak jokalari bikainak eman ditu. Imanol Garziandia, adibidez, Champions League lehiaketa jokatzen ari da Logroñoko Naturhouse taldearekin. Markel Beltza Bidasoan jokatzen ari da eta Iker Serrano, berriz, Frantziako Mulhouse taldean.
Asteburu honetan, Urolakoek kirola alde batera utziko dute eta ostalari lanetan arituko dira. Eta pilotalekua sagardotegi bilakatuko dute. Sagardoa edateko eta Euskal Herriko produktuak jateko aukera bikaina, herritik mugitu gabe.
