Igandera bitarte egongo dira Euskal Encounterreko antolatzaileak zein gonbidatuak Ederrena pilotalekuan. Parte hartzaileak, berriz, aurtengo egoera dela-eta etxetik konektatuko dira.
![](https://www.otamotz.eus/site/files/2020/07/img_0204-1-900x600.jpg)
Interneta oraindik ere gurera iristear zegoela ospatu zen lehenengo aldiz Euskal Encounterra Urretxuko Ederrena Pilotalekuan. Aurten, interneta lantresna nagusia den garaian, partaideak ezin izan dira ordenagailuentzat egokitutako gunera bertaratu baina teknologia berriei esker, etxetik konektatu dira Euskal Encounterraren 28. ediziora.
Arduraduna den Sabino San Vicente urretxuarra 1994. urtean ospatu zen lehenengo edizioan egon zen. San Vicentek jendearen erantzuna oso ona izan dela azpimarratu du. Gaurko eguna nola joango den ikustear dagoela aitortu du. Atzo 3.187 pertsona konektatu ziren Sabino San Vicentek ezagutzera eman duenaren arabera. Asteburuan zehar 5.000 erabiltzaileetara iritsiko direla esan du arduradunak.
Euskal Herriko Itzuliko erlojuaren aurkako proba
Mikel Alonso eta Diego Lopez arrabola ibili dira ospatu gabe geratu den Euskal Herriko Itzuliko erlojuaren aurkako proba eginez. B-Kool plataforma erabilita edonork parte hartu ahal izan du lasterketan. Laster argitaratuko dituzte probaren emaitzak webgunean.
Egitarau oparoa
Teknologia berriei buruzko hitzaldiak, jolasak, arte digital erakustaldiak, programazio eta bideo-joko lehiaketak egingo dira asteburuan zehar. League of Legends jokoko txapelketa da azpimarragarriena, Estatu espainiarreko talde onenek parte hartuko baitute.