Korrikaren 9. edizioak birritan zeharkatu zituen Urretxu eta Zumarraga, “Jalgi hadi euskaraz” lemapean.
Martxoaren 17an Donibane Garazin hasi eta 26an Gasteizen amaiera izan zuen KORRlKA 9, Urretxu eta Zumarragatik birritan igaro zen ostegunean hilaren 23an.
Eguraldia lagun, lasterketa osatzen zuten bost kilometrotan zehar goizez batez ere ikastetxeetako haurrak izan ziren protagonistak, arratsaldez berriz, helduak. KORRlKAren inguruan, KORRlKA BATZORDEak ekintza ugari antolatu zituen, hauek eta beste jakingarri batzuk doazkizue hurrengo lerroetan.
KORRIKA 9 edizioari martxoaren 17an Donibane Garazin eman zitzaion hasiera eta 26an Gasteizen amaitu zen, 2.150 kilo metro egin eta gero, hamar egunetan 300 herri inguru zeharkatuz.
Urretxun, ikastolako haur batek hartu zuen lekukoa Isabelen, goizeko 9.30ean, une batzuk beranduago gaztelekura iritsiz. Bertan, Urretxuko Gainzuriko ikastetxeko haurrak Zumarragako kaleetan sartu ziren goizeko hamarrak inguru.
Elizkalen San Jose ikastetxeak hartu zuen errelebua Eitza mendatean udaletxeko langileak zain zituztelarik.
Arratsaldean, berriro sartu zen korrika bi herrietan. Honakoan, lizeoko ikasleak, Bisasti AEK euskaltegikoak, Zumarragako udala, Iparragirre institutua, Amalur elkartea eta tabernariak, besteak beste, izan ziren lekuko eramaileak.
Jendetza ugari bildu zen eta oso giro polita bizi izan zen bost kilometrotako ibilbidean.
AEK-ko kideek, KORRIKA 9 euskararen aldeko lasterketa hutsean gera ez zedin, herrietan sortutako korrika batzordeei esker “Korrika kulturala” antolatu zuten.
Egitarau honen barruan, Urretxu eta Zumarragan txistulari eta trikitixak lagunduta, igandean, martxoaren 12an kuestazioa burutu zen.
Martxoak 13 ostiralean, Peio Zabaleta euskaldun idazleak hitzaldi bat eskaini zuen Zumarragako Itarte etxean, plazaratu berri duen poesia liburuaz hitz egiteko asmoz.
Martxoaren 23rako bertso eta trikitixaz girotutako herri afari bat antolatu zuten Galeperra elkartean. Igandean, Gasteizera joateko autobusak ere antolatu zituzten.
“Jalgi hadi euskaraz”, aurten antolatzaileek aukeratu duten leloak badu bere arrazoia, orain dela 450 urte Beñat Etxepare idazle garazitarrak euskaraz idatzitako lehen liburuan “Olerkiak” izenekoan, “Euskara jalgi hadi plazara,jalgi hadi mundura” idatzi baitzuen. Ekintza horri omenaldi bat egitea da leloaren arrazoia.
Omenaldi honez gain , AEK-k Mikel Laboa omendu zuen kulturgintza eta euskalgintzari eginiko ekarpenagatik. Bera omenduz bere belaunaldiko kantariek egindako lana eta euskararen berpiztean kantagintzak bete zuen zeregina azpimarratu nahi izan du AEK- k. Horretarako Mikel Laboari buruzko liburu bat argitaratu du KORRIKAk.
Bi urtez behin antolatzen den lasterketan lortzen den dirutzatik, sarrera garrantzitsuena kilometroen salmenta izaten da. Enpresa eta elkarteek erosle bezala lekukoa eramaten dute ibilbide horretan zehar. Lekuko horrek euskal kulturaren pertsonaia historiko batek idatzitako mezu bat darama barruan, Gasteizen azken kilometroa igaro eta gero, irakurri dena.
Material salmenta, kuestazioa eta KORRIKA LAGUNari esker diru nahikotxo lortzen da.
Aurtengo edizioan antolatzaileek euskaldunei arlo guztietan euskara bizi eta erabil dezatela eskatzen diete eta erdaldunei, berriz, ezagutu eta erabil dezatela. Beraz, badakigu!
