Zumarragako INEM bulegoan, Ezkio-Itsaso, Urretxu eta Zumarragako 1064 langabetu zeuden izena emanda apirilaren bukaeran. Hauetatik 21 Ezkiotarrak, 374 urretxuarrak eta 669 zumarragarrak dira.
Hala ere, Ramon Juaristik, bertako INEMeko zuzendariak, esan digunez, bertan jasotako datuak errealitatea zenbateraino erakusten duten jakitea zaila da. Izan ere, ikasten dauden ikasleez gain, lan egiteko asmorik ez duen jende askok ematen baitu izena INEMeko bulegoan, dirulaguntza desberdinak jaso ahal izateko.
Juaristik emandako datuen arabera, urte hasieratik langabetuen kopuruak behera egin duela esan dezakegu. Hilean batez beste 300 kontratu inguru egiten dira eta urte hasieratik martxora bitartean 887 kontratu sinatu dira.
Adinaren arabera, 25-45 urte bitartekoek osatzen dute langabetuen multzo handiena. Enpresariak bestalde, nahiago izaten du 20-35 urte bitarteko jende gaztea kontratatzea. Bi arrazoi izaten ditu enpresariak honetarako: Gazteak hobeto prestatuak egoteaz gain, enpresen beharretara eta teknologia berrira egokitzeko erraztasun handiagoa eta jarrera hobea izaten dutela eta 20-25 urteko gazteak praktika-kontratuekin sar daitezke enpresetan eta hau enpresarentzat merkeagoa da.
Kontratu berrietako %50a peoi lanetan aritzeko izaten omen da. Sexuari dagokionez, INEMen emakume gehiago izena emanda egon arren, kontratu berrien %79 gizonezkoentzat izaten da eta % 21 emakumezkoentzat.
Eskaerei dagokienez, ospitalea, Irizar eta GSB-Bellota dira langile gehien eskatzen duten inguruko enpresak.
Aldikako lan enpresen sorrerak, (ALE edo EIT) eta Langaien sorrera nabaritu da INEMen eta orain lan egiteko eskaerak hiru toki hauetan egiten dira. Unibertsitateko kolegioetan ere, zenbait lizentziatuk topatzen dute lana.
Aldikako lan enpresek beharrak asetzeko funtzioa betetzen dutela adierazi dute sindikatuek. Honetaz gain, gazteen lan egoera kaxkarra konpontzeko batere baliagarriak ez direla salatu dute eta ALEen bidez kontratatutako langileen soldata baxuak ere salatu dituzte sindikatuek.
