Zorionekoak gu!! Wilcok diska berria kaleratu du: Sky Blues Sky. Nola ez bada, zuzenean defendatuko du. Hilaren bukaeran Bartzelonako Primavera Sound jaialdian joko du. Bertara joatea gomendatuko nuke. Chicagoko taldeak baduelako zerbait. Jeff Tweedyk konposatutako abestiek, bere kantatzeko erak, hitzek, magiaren moduko zerbait badutelako. Americana edo country-rockean sendotzen da euren musika, baina hori baino askoz ere gehiago da. Estiloak beldurrik gabe eta era dotorean nahasteko abilezia, esperimentazioa, konponketa ederrak, melodia gozagarriak… Hori guztia nortasun handiarekin. Zaratarik atera gabe, barru-barruraino heltzen dira Wilcoren doinuak. Euren lanetako bat gomendatzearren, Summerteeth (1999) maisulanaren aldeko hautua egingo nuke. Entzun eta gozatu.
