“Farmaziakoak lagunak nituen, sarritan etortzen nintzen beraiengana eta eurekin aritzea eskaini zidaten”. Beranduago, farmazia eta drogeria banatu ziren eta, duela 20 urte pasatxo, Urtaranek denda hartu zuen. “Negozioa nirea denez, aurrera egiten dut, baina garai batean herrietan gehiago saltzen zen”, dio. 2009 urte hasieran erretiroa hartuko du.
Zer izan nahi zenuen umetan?
Ezer ez bereziki.
Aisialdian zer egitea atsegin duzu?
Ibiltzea gustatzen zait gehien. Antiora eta Belokira joan zalea naiz.
Bizitzeko toki bat?
Zumarraga ez nuke Donostiagatik ere aldatuko. Herrietako bizitza kalitatea hirietakoa baino hobea da. Denok elkar ezagutzen dugu eta elkarrekin hitz egiten dugu.
Zein perfume atsegin duzu?
Perfumeez nekatuta nago jada… Usain garbia eta freskoa dutenak atsegin ditut. Astunak, ordea, ez ditut atsegin.
Jasan ezin duzun usainen bat?
Ez dago bereziki nazka ematen didan usainik.
Usaimena garatuta ala gogaituta al duzu?
Lan honetan zentzumen hori garatu egiten dela uste dut.
Gizonezkoek lehen baino gehiago zaintzen al dute itxura?
Eurentzat zenbat produktu atera diren ikustea besterik ez dago. Gazteak inongo erreparorik gabe etortzen dira dendara.
Zumarragar peto-petoa zara. Nola bizi dituzu festak?
Santa Isabel egunean ezin da kale egin: meza, pintxoa eta jendearekin hitz egin. Bestalde, plazan bizi naizenez, txaranga eta orkestra guztiak entzuten ditut. Gu ere gazteak izan ginen…
Ilehoriak ala beltzaranak?
Dagoeneko… Beltzaranen edertasuna gehiago gustatu izan zait beti, bai gizonezkoetan eta baita emakumezkoetan ere.
Egindako azken oparia?
Opariak egin zalea naiz. Ez dut oroitzen noiz egin nuen azkenekoz arrazoi berezi batengatik. Iloben urtebetetze egunetan izango zen.
Eta jasotakoa?
Nire urtebetetze egunean jasoko nuen azkenekoa.
Data bat?
Errege Eguna eta ingurukoak. Izan ere, urtarrilaren 7an jaiotakoa naiz eta familiako beste zenbaitzuk ere egun horren inguruan betetzen dituzte urteak.
Neska eta mutil izen bana?
Ilobenak: Josu eta Maialen.
Zein egunkari irakurtzen duzu?
DV erosten dut eta ahizparenean Noticias irakurtzen dut.
Gustuko telebista saioa?
La noche tematica, Callejeros eta filmak atsegin ditut gehien.
Bereziki gorroto duzuna?
Salsa Rosa eta antzekoek gaixo jartzen naute.
Liburu bat?
Toti Martinez de Lezearen bat irakurtzen ari naiz.
Abesti bat?
Benito Lertxundi asko gustatzen zait.
Soinu bat?
Pianoarena.
Usain bat?
Belar moztuarena oso atsegina da.
Janari bat?
Denetarik duten entsaladak.
Ura ala…
Ardo ona. Egunero hartzen dut bat, lanetik irten ondoren.
