Bertako eta kanpoko idazleek parte hartuko dute Ilunabar Literarioan. Ekitaldia kultur etxean egingo da, bihar 19:30ean. Antolatzaileek adierazitakoaren arabera ez da ekitaldi itxia izango eta norbaitek testuren bat irakurtzeko asmoa balu bertara agertzea besterik ez du.
Iaz bezala, ekimenak herriko kultura arloan literatura sustatzea du helburu nagusietakoa, eta horregatik parte hartzea garrantzitsua dela nabarmendu dute.
Ilunabar literarioan Bergarako Idazle Eskolako ikasleen lanak biltzen dituen Luma berrien eleak aldizkariaren seigarren zenbakia ere aurkeztuko dute.
Zenbaki honetan berrikuntza batzuekin dator Idazle Eskola. Alde batetik azalaren diseinua aldatu egin da, eta bestetik Idazle Eskolako ikasleek kudeatzen duten www.idazten.com webgunean irakur daitezke aldizkari hau eta aurreko zenbaki guztiak.
Webguneko Entzuketak atalean klikatuz gero aldizkarian horretarako prestatutako lanak entzun daitezke eta hamar narrazio ere irakurtzeko moduan daude. Tartean Amaia Artolazabal eta Gorka Azkarate herritarrenak.
