Zorionak Amaia!
Gaiaren inguruko albiste gehiago otamotz.eus-en:
Amaiaren lana irakurri hemen:
Pantailak itzali du
zu hurbildu zinen atzo
animoa ezin jaso
goibel jarriz aurpegia
azalduz gure egia
utzi zenidan bihotza
kanpoan zegoen hotza
bezain izoztuta ia
begirada jasoz gora
malkoak jausiz segidan
dena egotzi zenidan
ez omen goaz inora
ez omen zaude gustora
ta ni mindu egin nintzen
ez omen dizut eskaintzen
zuk nahi adina denbora.
2) Ordenagailuarekin
beti omen nagoenez
nazkatu zara aidanez
hala diozu behinepin
baina nahi bazenu jakin
orotan zauzkat presente
pentsatzen baitut dezente
zugan, zugatik, zurekin
eztabaidaren baten truk
itzaltzean gure sua
ordenagailu dontsua
bihurtu den gisan arrunt
berehala piztu ohi dut
baina nik normala denez
ordenagailu hori ez,
zu irazeki nahi zaitut.
3) Behin piztuta nire xerka
zatoz zu birus moduko
pantailari so orduko
zu topatzen zaitut eta;
zure argazkiz beteta
baitut eskritorioa
denen erremedioa
dut zuganako arreta
gero worden hasten naiz fin
gure artean nolanahi
“intro” ez dut sakatu nahi
transkribatzen bezain arin.
Hala egiten dizut zin
maitatuko zaitut ozen
inoiz izan ez gaitezen
bi paragrafo desberdin.
4) Bere kable eta guzi
sagua higitu ohi dut
ez zenuke jasango zuk
bere askatasun gutxi
baitidazu erakutsi
independentzi beharra
hargatik ez naiz senarra
ez eta zure nagusi
ta niretzat denez luxu
har zazu nire magala
nik pantailari bezala
arren emadazu musu
nahiz egiten duzun usu
egin gaur ere mesede
ta e-mailez bada ere
beste bat jasoko duzu.
5) Bai, arrazoi duzu, hala
ematen dut nik eguna
ordenagailu laguna
pare-parean dudala
nik zure lana bezala
onar zazu zuk nirea
biok dakigu, ordea,
denboran duen itzala
klik nire lanen karpetan
klik leihatila bat itxi
klik antibirusa jaitsi
klik google orrian bertan
klik-ak klik-ekin hizketan
baina sagutik harago
zu klikatzea nahiago
gau birtual horietan.
6) Beti pentsatzea zugan
ez bada asti eskaintza
alfer-alferrik zabiltza
gehiagoren zain tristuran
lanbidea baitut mugan
ta zuk badakizu hori,
ez, ordea, horren ongi
zenbat maitatzen zaitudan
dena botaz pikutara
eten nahi duzu kablea
ez naizen arren zalea
agian hobe da laga
usu ibiltzen baikara
itzaliz ta piztuz errez
elektrizitatea ez,
konexioa falta da.
