Josune Agirre zumarragarra ikastolako eta institutuko ikaslea izan zen.
Musika ikasketak bukatu aurretik Secundino Esnaola musika eskolan lanean hasi zen eta dagoeneko 22 urte daramatza bertan. Egun ikastetxeko zuzendaria ere bada. Ama musika zalea du eta bere bitartez hasi zen solfeoa ikasten. Ondoren, pianoa jotzen ikasi zuen. Musikari denbora asko eskaini behar zaiola dio. Horregatik, seme-alabak Secundino Esnaolan matrikulatu nahi dituzten gurasoei, haurrak eskolara gogoz joatea ezinbestekoa dela esaten die.
Zer izan nahi zenuen umetan?
Musikaria.
Aisialdian zer egitea atsegin duzu?
Mendira joatea.
Bizitzeko toki bat?
Zumarragakoa naizenez, Zumarraga. Dena den, Urretxun oso ondo bizi naiz.
Gustuko mendia?
Urretxun bizi naizenetik Irimora joaten naiz askotan. Lehen Izazpira joaten nintzen gehiago.
Zein musika mota atsegin duzu gehien?
Klasikoa.
Zein da zure musikari edo konpositore kuttuna?
Bach.
Ba al dago jasan ezin duzun musika motarik?
Rock gogorra ez zait batere gustatzen. Senarrak eta biok ika-mikak izaten ditugu kontu hori dela eta. Autoan txandaka jartzen dugu musika. Alabak, berriz, denetik entzuten du.
Ilehoriak ala beltzaranak?
Berdin zait. Guztiak.
Egindako azken oparia?
Bulegorako aulki bat aitari.
Eta jasotakoa?
Kirola egiteko arropa.
Data bat?
Santa Lutzi eguna. Gabonetan ezin izaten gara etxeko guztiak elkartu, baina Santa Lutzitan bai. Gainera, kaleko giroa bikaina izaten da.
Neska eta mutil izen bana?
Jone, alabarena, eta Martin.
Zein egunkari irakurtzen duzu?
Noticias de Gipuzkoa eta El Diario Vasco. Asteburuetan El País ere irakurtzen dut.
Gustuko telebista saioa?
Pelikulak.
Bereziki gorroto duzuna?
Futbola.
Liburu bat?
Ildefonso Falcones idazlearen La catedral del mar asko gustatu zait, baina liburu on asko daude. Irakurzalea naiz eta beti dut libururen bat eskuartean.
Pelikula bat?
Ez dago izugarri gustatzen zaidanik.
Soinu bat?
Pianoarena.
Usain bat?
Belar moztu berriarena eta mendiarena euria egiten duenean. Musika ikastetxearen kanpoaldean lorategi bikaina dugu eta primeran zaintzen dute.
Janari bat?
Denetik gustatzen zait, baina bereziki amak prestatzen duen gisatua.
Ura ala…
Sagardoa.
