Bihar izango dira kontuak (157. alea)

2010/05/24

Otamotz

9:00: Geroz eta nagitasun handiagoa ematen du goizean denda irekitzeko garaiz jaikitzeak. Garraio-gizonak etortzen direlako kamioiak hustu eta dendako apalak betetzera, bestela…

Egun on, etxekoandre!
Egun on! Oraintxe irekiko dizut biltegiko atea.
Ondo da.

Iraungi egiten dira jakiak, galdu egiten dira fruta eta barazkiak, gora doa argindarraren prezioa eta hilero-hilero ailegatzen dira fakturak. Eta kontuak ez dira ateratzen.

Hurrena arte, etxekoandre!
Poliki joan!
Itxi dugu biltegiko atea.
Eskerrik asko!

12:00 Ez dago ordubete aurretik denda ixteko prestatzen hastea baino gauza tristeagorik. 12:55 arte ez da hurrengo bezeroa etorriko.

Eguerdi on, Koro!
Baita zuri ere! Lauzpabost txanpon, mesedez!
Tori.
Eskerrik asko.

Eta beste galdutako goiz baten sentsazioarekin joango da etxera, goserik gabe eta burua jatera. 12:55 Dena txukun-txukun dago. Badator goiza ixteko espero zen azken bezeroa.

Eguerdi on, Koro!
Baita zuri ere! 11,38 euro, mesedez.
Tori, justu ematen dizut. Bihar arte!
Eskerrik asko, aio!

16:30 Zertarako lehenago etorri ezer prestatzera. Arratsaldeko lehenengo bezeroa etorri arte, izango da goizean desordenatu ez dena atontzeko tarterik. 18:00 Mugimendua nabari da dendan. Edonola, eskuko hatzekin kontatu ahalko dira gaur ere bezeroak.

Arratsalde on!
Kaixo!
Zer moduz, Koro?

Umeen meriendarako dozena-erdi bat sagar. Oliba-olioa, botila bat. Gatza. Tetrabrik pare bat esnea, 2 kg patata, baratxuri-buru sorta bi… Betikoa, eta pozik egon behar! 18:15 Zertara ote datoz tente mantendu ezin daitezkeen gazte horiek dendara?

Viva denda honetako andrea!
Ssssss! Ez eskandalurik egin. Bota egingo gaituzte eta!
Bota…. Desafioa bota didazu kalamidade horrek… Nireak gehiago pisatu baietz!
Hementxe dago fruta eta barazkien saila. Atera ezazu zure aparatutxoa, ea balantzara iristen zaizun. Ja, ja, ja!
Hasi zeu! Ez zara txilibitua atera eta pisatzera ausartzen ala? Txori txikiak ez du kabitik atera nahi…

18:30 Aztoratu dira arratsaldeko bezeroak, salbuespen egoera aldarrikatu da dendan.

Mesedez, gazteok! Gorde zuen zakilak beren tokian, eta ezer erosteko asmorik ez baduzue, irten dendatik.
Lasai, andrea! Bagoaz.
Zer gertatzen zaizue zuei? Ez al duzue halako gizonik inoiz ikusi?
Zaude isilik, kalamidadea. Hemen ez da ezer gertatu, gu bagoaz.
Gertatuko ez zen, ba! Harro-haizeak bukatu zaizkizu, lagun. Pisuan gehiago da nirea!
Ez dizuet berriz esango. Oraintxe ez bazoazte, poliziari deituko diot.
Hobe dugu kasu egin. Zuretzat txapela.
Denok testigu, entzun diozue.

Bukatu da dendako lehenengo salbuespen egoera. Astegun buruzurian mozkortuta gizontasun apustuak egiten… Nora iritsiko ote gara? 19:00 Badator bigarren salbuespen egoera: bete egin da denda. Orain ezingo du Korok ordubete aurretik denda ixteko prestaketak egiten hasi.