Iñaki Okariz zumarragarra aurtengo Aizkorriko maratoian parte hartu duen herritarretako bat da. 27 urte ditu.
Ikastolatik eta lizeotik pasa ondoren, Ordizian eta Tolosan ikasi zuen. Soldatzaile titulua du. Legazpin lan egin zuen, Oria eta Ulma enpresetan, eta egun Beasaingo CAFen dihardu. Kirola betidanik du gustuko. Ingurukoen eraginez hasi zen korrika egiten. Bere lehen lasterketa Lasarte-Oriakoa izan zen eta duela bi urte lehenengoz Behobia egin zuen. Mendiko lasterketetan, berriz, aurtengoa bigarren denboraldia du.
Zer izan nahi zenuen umetan?
Gainontzeko mutiko guztiek bezala, futbolaria.
Aisialdian zer egitea atsegin duzu?
Mendira joatea, lagunekin egotea, raketan jokatzea…
Bizitzeko toki bat?
Zumarraga.
Gustuko mendiko lasterketa?
Herrian antolatzen dena, nondik nora gabiltzan jakitea mesedegarria baita. Aizkorriko maratoia ere asko gustatu zitzaidan. Egiteko gogoa nuen eta, sofritu nuen arren, oso gustura gelditu nintzen.
Zer nahiago duzu, aldapak igotzea ala jaistea?
Biak. Gustuko tokian aldaparik ez.
Zer gustatu zitzaizun gehien?
Giroa eta horren lasterketa garrantzitsua bukatu izana.
Zer izan zen gogorrena?
Sancti Spiritutik gorako bidea.
Berriro parte hartzeko asmorik ba al duzu?
Bai, bai…
Gustuko mendia?
Lehen zazpi puntak egiten nituen, baina orain entrenamendu luzeagoak egiten ditut eta Izazpi, Samiño eta Oletako buelta egiten dut.
Ilehoriak ala beltzaranak?
Denak.
Egindako azken oparia?
Izeba Begoñari oparitutako kosmetikoak. Nire amabitxia da.
Eta jasotakoa?
Neure buruari egindakoak balio al du? Egin didaten azkena zein den ez dut gogoratzen eta…
Data bat?
Santa Lutzi eguna. Udaberri hasiera ere asko gustatzen zait.
Mutil eta neska izen bana?
Aratz eta Haizea.
Zein egunkari irakurtzen duzu?
Tabernan lehenengo topatzen dudana. Bat baino gehiago badago, bat baino gehiago irakurtzen dut.
Gustuko telebista saioa?
Ez dut telebista ikusteko ohitura handirik. Azkenaldian El conquistador del fin del mundo ikusten dut.
Bereziki gorroto duzuna?
Gran Hermano.
Liburu bat?
Aspaldi honetan ez dut libururik irakurri.
Pelikula bat?
La vida de Brian.
Soinu bat?
Olatuek ateratzen dutena.
Usain bat?
Amak prestatutako jakiena.
Janari bat?
Patata tortila eta gazta tarta.
Ura ala…
Garagardoa.
