Ekainaren 15ean Caja Laboral-Baskonia taldeak hirugarren ACB liga irabazi zuen.
Ez sinesteko modukoa izan zen: segundo erdiren faltan Fernando San Emeteriok partida berdindu zuen eta, falta egin ziotenez, ondoren sartu zuen jaurtiketa gehigarriari esker bere taldeak titulua lortu zuen. Azken jaurtiketa librea egiteko erabili zuen baloia eskuetan izan duen garrantzitsuena da, baina egun ez dago bere esku: Patxi Jarit zumarragarrak du. Jarit pilota berari emateko prest da.
Patxi Jarit, beste urretxuar eta zumarragar asko bezala, Caja Laboral-Baskonia taldearen jarraitzailea da. “Bartzelonaren aurkako finalaren hirugarren partidarako sarrerak erosi genituen, baina ez genuen uste gasteiztarrek Bartzelonako lehen bi partidak irabaziko zituztenik eta hirugarrena erabakigarria izango zenik”, aitortu du.
San Emeteriok jaurtiketa librea sartu ondoren, Bartzelonak atzeko marratik atera zuen, Basilek baloia jaurti zuen, uztaian jo zuen eta errebotatu egin zuen. Baskonia dagoeneko txapelduna zen. Jaritek sekulako poza hartu zuen Basile italiarrak kale egin zuela ikusi zuenean eta poza estasi bihurtu zen baloia bere hanketara heltzen ikusi zuenean. “Lehen ilaran geunden eta pilotak gugana errebotatu zuen. Hartu egin nuen eta inguruko guztiek zoriondu egin ninduten. Etxera sekulako altxorra neramala esan zidaten”, oroitzen du.
Aipatu bezala, baloia saskibaloi Baskoniako jokalariari emateko prest dago. Ederki asko daki San Emeteriok erabilitako ehunka piloten artean garrantzitsuena dela. Izan ere, Urretxuko Laket tabernako nagusia kirol zale amorratua da. Hala, tabernako telebista pizten du Baskoniak partida jokatzen duen bakoitzean eta askotan joaten da Buesa Arenara. “Euroligako partidak ikustera joaten naiz batez ere. Gasteizen Europako talde onenak ikusi ditut. Asko gara Buesa Arenara joaten garen urretxuar eta zumarragarrak”, azaldu du.
Azken bisitalditik harribitxi batekin itzuli zen, baina kirolarekin lotutako bere altxor bakarra. “Rod Stewart abeslariaren kontzertu batean ikusleengana bota zuen futbol baloietako bat hartu nuen”, gogoratzen du. Eskuetan imanak dituela ikusirik, atezain edo pibot bikaina izan zitekeen. Gehien atsegin duen kirola txirrindularitza da, ordea. Gaztetan txirrindularia izan zen eta bere benjamin mailakoa zenean Abraham Olanok infantil mailako “lasterketa guztiak” irabazten zituela dio.
Jaritek jubenil mailan utzi zion lehiatzeari, baina egun ere bizikletan ibiltzen da. Ekainaren 19an Treparriscos proban parte hartu zuen eta uztailean Tourra ikustera joango da. “Azken 15 urteetan urtero joan naiz eta oraingoan Tourmalet igotzen saiatu behar dut”, aipatu du.
Txirrindularitzaz eta saskibaloiaz gain, pilota eta futbola ere atsegin ditu. “Nire emazteak ere pilota gustuko du. Igandero Astelena pilotalekura joaten ginen eta Irujoren eta Xalaren arteko buruz buruko finala pilotalekuan ikusi nuen”. Futbolari dagokionez, duela hamar bat denboralditik hona Realeko bazkidea da. Talde Txuri-Urdina txapeldunorde izan zen denboraldian Anoetako partida “guztiak” ikusi zituen eta Lyonera joan zen Champions League txapelketako final zortzirenetako partida ikustera. Mendizorrotzako partida tristea ere ikusi zuen. Zorionez, aspaldiko partez, denboraldi honetan Realarekin gozatzeko aukera izan du. “Cadizen izan nintzen eta baita Celtaren aurkako partidan ere”.
Realeko jokalariak Urretxu eta Zumarragara etorri ziren egunean ere ez zuen kale egin. Zumarragako udaletxera sartu eta jokalari guztiei berarentzat oso berezia den kamiseta batean sinatzeko eskatu zien: Realaren kamiseta hori bere emazteak eta berak espero duten semearentzat erosi du. San Emeterio ere ez da sinatzeaz libratuko Urretxuko Laket tabernara bere baloiaren eske etortzen bada.
