Fermin Goenaga zumarragarrak ostalaritza munduan lan egin du urte askotan. Ezkiotarra tabernan hasi zen eta ondoren Suitzan, Frantzian eta Italian lan egin zuen.
Handik itzuli zenean Zelai Arizti taberna hartu zuen. Berit izenekoaz ere arduratu zen eta bera izan zen Zelaikoa tabernako lehen nagusia. Sendabelarren eta likoreen munduak oso gustuko ditu eta Luis Romero lagunarekin batera onddo-likorea egin du. Perretxikoekin edaria egiten lehenak direla uste dute eta oso gustura daude izandako harreraz.
Zer izan nahi zenuen umetan?
Ostalaria. 13 urterekin Ezkiotarran hasi nintzen.
Aisialdian zer egitea atsegin duzu?
Poteatzea eta lagunentzat gutiziak prestatzea. Bestalde, sendabelarren mundua oso gustukoa dut.
Bizitzeko toki bat?
Italia. Gaztaroa han eman nuen eta oso gustuko dut. Semeagatik ez balitz hara joango nintzateke.
Gustuko likorea?
Benedictine. Leireko upategi pribatuan izan nintzen Fray Germanekin eta Espainiako erregearen ondoren sinatu nuen bisita liburuan.
Gustuko perretxikoa?
Onddoa.
Gustuko konbinatua?
Havana rona limoizko Kasarekin. Juan Carlos Irizar piano-jolearen eskutik hasi nintzen rona edaten.
Ilehoriak ala beltzaranak?
Garrantzitsuena izaera da.
Egindako azken oparia?
Onddo batzuk Ezkiotarra taberna eraman zuen Consuelori. Emakume bikaina da. Sekulako sentikortasuna du eta berak irakatsi zidan lanbidea.
Eta jasotakoa?
Consuelok berak emandako musua.
Data bat?
Urriaren 14a. Egun horretan jaio eta hil zen nire aita. Oso gaizki pasatu nuen hil zenean.
Mutil eta neska izen bana?
Ander, semearena, eta Lourdes, arrebarena.
Zein egunkari irakurtzen duzu?
Lehen DV bakarrik irakurtzen nuen eta duela urtebete ingurutik hona Noticias de Gipuzkoa ere bai. Orain langabezian nago eta egunkari gehiago irakurtzeko astia dut, baina kiroletakoak ez ditut irakurtzen.
Gustuko telebista saioa?
Telebista oso gutxi ikusten dut.
Bereziki gorroto duzuna?
Reality show direlakoak eta bihotzekoak ezin ditut jasan.
Pelikula bat?
Gehien txunditu nauena Papillon da. 1974an ikusi nuen, frantsesez, eta benetan txunditu ninduen lehen filma izan zen.
Liburu bat?
Maurice Messegueren sendabelarren liburua. Landareen historia kontatzen du. Nik antzerako zer edo zer egiten nuen Segura Irratian izan nuen irratsaioan.
Soinu bat?
Haizearena udazkenean, hostoak botatzen dituenean.
Usain bat?
Belar moztu berriarena asko gustatzen zait.
Janari bat?
Tagliatelle bologniar erara.
Ura ala…
Ardoa. Aukeran, Marchese di Barolo.
