17 urteko ibilbide luzearen ondoren, honako hau duzue azken ‘Otamotz’ alea. Otsailaren 3an Goierri mailako ‘Goiberri’ astekariak hartuko du bere tokia.
Agur ‘Otamotz’. Eskerrik asko euskararen alde egindako lanagatik. Eskerrik asko urretxuar eta zumarragarren ekimen, bizipen eta iritziei merezi zuten oihartzuna emateagatik.
Urretxu eta Zumarragan ez zegoen herriko albisteak euskaraz irakurtzeko aukerarik eta, 90eko hamarkada erdialdean, jaio berria zen Zintzo-Mintzo euskaltzale elkarteak Otamotz aldizkaria sortu zuen. Ordutik 174 ale kaleratu dira. Hamaika albiste, historia eta istorio bildu ditu. Bi herriotan azken 17 urteetan erreferentzia izan dela esan dezakegu, Urretxun eta Zumarragan euskaraz bizi nahi dugunon erreferentzia.
Urte hauetan guztietan egoera berrietara egokitzen jakin du eta tartean beste proiektu batzuk ahalbidetzen ere lan egin du. Horren adibide nagusiena Goierriko Hitza egunkaria da. Makina bat une gozo bizi izan baditugu ere oztopo bat baino gehiago ere izan da denbora honetan guztian. Baina euskararen indarrak lagunduta, irakurleek ematen duten indarrak lagunduta, guztiak gainditu izan ditugu.
2012ra begira erronka berria du Otamotz aldizkariak. Prentsa idatziarentzat ez dira garai onenak, izan ere, teknologia berrien ondorioz, papera krisian baitago. Baina aurrera egiteko garaia da, eredu berriak eta apustu berriak egiteko garaia da.
Bidelagun egokia eta naturala aurkitu du Otamotzek bide horretarako. Goierri Beheko Goierritarra aldizkaria. Goierritarra aldizkaria hamabostekaria izan da eta Otamotz, berriz, hilabetekaria. Orain, otsailaren 3tik aurrera kalean izango den produktu berria, astekaria izango da.
Beharrak sortu du elkarlan hau: maiztasunean irabazteko beharrak, erreferentzialtasunean irabazteko beharrak, produktu berria sortzeko beharrak eta Goierriko Hitzaren estrategia beretik jarraituz, Goierri osorako lan egiteko beharrak.
Irakurleekin, iragarleekin eta adituekin egindako ikerketak eta hausnarketak ere ondorio horretara eraman gaitu. Otamotzek, gehiago eragin nahi du euskararen normalizazioan eta eskualdeko komunikazioan.
Berria, berritzailea, bizia, betikoa, berezia…. Izango da Goierriko astekari berria. Betiko izaerari eutsiz diseinu berritzailearekin eta eduki berriekin jaioko da Goierriko astekari berria. Hori bai, inoiz baino indartsuago izango da, indarrak batzeak eta elkarlanak ematen duen indarra izango baitu. Otsailaren 3tik aurrera beraz, inoiz baino maizago eta indartsuago elkar ikusiko dugu.
Bukatzeko, mila esker urte hauetan guztietan Otamotz osatu duzuen guztiei: ezerezetik aldizkaria sortu zenutenei, irakurleei, iragarleei eta kolaboratzaileei. Bereziki urte hasiera honetan joan zareten bi irakurle fin eta pertsona eredugarriri: Joxe Mari Lasari eta Cristina Jauregiri.
