Marian Toledo urretxuarrak ikastolan eta institutuan egin zituen oinarrizko ikasketak. Ondoren Euskal Filologia ikasi zuen Gasteizen.
Berak ikasketak bukatu zituen garai berean Beasaingo udal euskaltegia ireki zen eta bertan lan egiteko probetara aurkeztea erabaki zuen. Ordutik bertan dihardu. ‘Otamotz’ ere hasieratik ezagutzen du, sorreran parte hartu baitzuen. Aldizkariko zuzentzailea da. Korrika eta presaka idatzitako zenbat testu txukundu ote ditu, beti gogo onez eta irrifarrea ahoan. Mila esker Marian!
Zer izan nahi zenuen umetan?
Kantautorea izan nahi nuen. Ispilu aurrean abesten nuen eta erretiratutakoan abesbatzaren batean abesteko asmoa dut.
Aisialdian zer egitea atsegin duzu?
Lagunekin egon, leku berriak ezagutu, naturaz gozatu…
Bizitzeko toki bat?
Etxekoengandk eta lagunengandik gertu dagoen edozein toki.
Beasain ala Urretxu?
Urretxu.
Beasainen bizi zarete. Zer diote seme-alabek?
Zaharrenak Urretxukoa dela esaten du eta alabak, berriz, beasaindarra dela.
Euskarazko hitz kuttuna?
Askatasuna.
Gehien kezkatzen zaituen akatsa?
Aditzaren aspektua, esaldiaren hasieran jartzeko gero eta joera handiagoa dago. Adierazkortasunean ditugun mugak ere kezkatzekoak dira. Gaztelerara jotzen dugu, baina ez da euskararen mugek eraginda, gure mugek eraginda baizik.
Ilehoriak ala beltzaranak?
Ilea urdintzen edo txuritzen hasitakoak.
Egindako azken oparia?
Olentzerori laguntzen egindakoak.
Eta jasotakoa?
Olentzerok ekarritako Buff-a.
Data bat?
Ezkondu ginen eguna berezia da: 2002-2-2. Data borobila egun borobil baterako.
Mutil eta neska izen bana?
Seme-alabenak: Joseba eta Uxue.
Zein egunkari irakurtzen duzu?
Berria eta Hitza. Astebukaeretan, berriz, amak gordeta edukitzen dituenak ere bai: DV, Noticias, El País…
Gustuko telebista saioa?
Bidaiei buruzkoak gustatzen zaizkit. Españoles en el mundo, adibidez. Mahai-inguruak ere gustukoak ditut, baina guztiak kentzen ari dira. Dagoeneko 24 horas katean bakarrik aurkitzen ditut.
Bereziki gorroto duzuna?
Haurrei Clan moduko kateak asko gustatzen zaizkie eta amorrua ematen dit. Ez zaizkit batera gustatzen kate horietan sustatzen dizuten baloreak.
Pelikula bat?
Negar egitekoak eta benetan gertatutakoetan oinarritutakoak gustatzen zaizkit. El color púrpura eta La lista de Schindler, adibidez.
Liburu bat?
Asko. Joxe Azurmendiren Espainolak eta euskaldunak, adibidez.
Soinu bat?
Gitarrarena.
Usain bat?
Kafe egin berriarena.
Janari bat?
Zer ez?
Ura ala…
Ardo beltza.
