Elkartasun dendarik ez da izango aurtengo Gabonetan Zumarragan. Aintzane Arizmendiarrieta Misio taldeko kideak adierazi duenez, «egoera ekonomikoa dela eta, ez dugu denda irekitzeko paradarik izango». Azken urteetan, Gabonetan, elkartasun denda zabaldu izan dute Misio taldeko kideek eta Andre Mari Jasokundearen parrokiako katekistek. Bidezko merkataritza barruko produktuak saldu izan dituzte. Helburua ez da izan etekin ekonomikoa ateratzea, merkataritza mota horren berri ematea baizik. Edozein modutan, atera izan dutena proiektu ezberdinak laguntzeko erabili izan dute. Iaz Haitira gaztetxoek ikasteko lanparak bidali zituzten. Etorkizuna zalantzan Arizmendiarrietaren arabera, «gure asmoa ez da egitasmoa betirako bertan behera uztea, baina ez dakigu zertan geratuko den, martxan berriz jartzea ez baita erraza izango». Iazko salmentetan ez zituzten krisiaren ondorioak nozitu, izan ere urte hauetan guztietan dendak bere tokia egin du. Hala eta guztiz ere, geroz eta gutxiago dira dituzten baliabideak.
