XXIII. edizioa izango da aurtengoa eta beste urteetan ez bezala, hiru asteburutara mugatu dute aurten egitaraua.
Datorren igandean hasiko da Urretxun Udazkeneko Musika Zikloa. Aurtengoa hogeita hirugarren urtea izango da, eta beste urte batzuetan ez bezala, hiru asteburutara murriztu dute egitaraua, «dirua ere murriztu» egin delako Javier Arratibel Goiargi abesbatzako zuzendariak eta ekimenaren antolatzaileak esan duenez.
Zumaiako San Pedro abesbatzak irekiko du zikloa igandean, azaroaren 3an Ameriketako Estatu Batuetako Ecu Chambers Singers taldearen txanda izango da, eta ohi bezala Urretxuko eta Zumarragako Goiargi abesbatzak itxiko du zikloa, azaroaren 10ean. Urtero izaten da Urretxun Tolosako abesbatza lehiaketan parte hartzen duen talderen bat, hori da Ecu Chambers Singers-en kasua.
Emanaldi guztiak ohi bezala, Urretxuko Tourseko Martin Donearen elizan izango dira, 19:00etan hasita. Arratibelek herritarrak animatu nahi izan ditu ekimenean parte hartzera, izan ere «herrian antolatzen diren ekintzak herritarrei eskaintzeko antolatzen» dira.
Herriko eta kanpoko ikusleak
Urretxuko Udazkeneko Musika Zikloak jende «asko» erakartzen du Arratibelen esanetan, eta Urretxutik eta Zumarragatik ez ezik «kanpotik ere jendea gerturatzen» dela gaineratu du. Adin tarte guztietako ikusleak biltzen dira Tourseko Martin Donearen elizan «gazteak ere bai, asko». Musika «ezberdina» ezagutzeko eta «igande arratsalde bat gozatzeko» aukera eskainiko du besteak beste, zikloak.
