Iaztik martxan dagoen dantza afrikarreko klaseen osagarri izango da; bihar ate irekien jardunaldia izango da.
Perkusio afrikarra jotzen ikasteko ikastaroa antolatu dute Urretxun. Iaztik martxan dagoen dantza afrikarreko klaseen osagarri izango da. Ostegunetan eskainiko dituzte oraindik zehazteke dagoen lekuan. Bihar, ate irekien jardunaldia egingo dute Lizeo azpiko lokalean, eta interesa duten herritar guztiak gonbidatu dituzte bertara erritmo afrikarrak zuzenean entzun eta nola jotzen diren ikustera.
Julio Ngovenek eskainiko du perkusio ikastaroa, baina ez da hau mozambiketarra Urretxun irakasle lanetan arituko den lehenengo aldia. Maite Arbonies bere ikasleetako batek kontatu duenez, Ngovene Donostian bizi da eta bertan talde batean jotzen du. Zumarragako jai batzuetan etorri zen lehenengoz «Irrintzi dantza taldeak antolatutako dantza jaialdira». Harreman horretatik sortu zen dantza afrikarreko klaseak ematen hasteko ideia. Irrintzikoen ikastaroa amaituta beste talde osatu eta iazko irailetik martxan da Urretxun dantza afrikarren beste dantza ikastaro bat.
Aurten, dantza saioez gain «perkusio afrikarra irakasteko aukera» zabaldu nahi dute, irakaslearen proposamenez. Helburua, perkusio afrikarraren oinarriak zabaltzea da, eta hala suertatzen bada «dantza egiteko musika zuzenean jokoko duen taldetxo bat eratzea». Dum-dum-ak eta djembe-ak dira erabiltzen diren danbor itxurako musika tresnak. Bihar, zuzenean ikusi eta probatzeko ate irekien jardunaldia antolatu dute, «18:00etatik 19:30era perkusio klaseena eta 19:30etik 21:00etara dantzarena». Interesa duten herritar guztiak animatu dituzte bertara.
