Italian berriki egindako Limone Extreme lasterketan hirugarren postua lortu eta gero, laugarren gelditu da urretxuarra mundu mailako sailkapen orokorrean, munduko korrikalari onenen artean.
Aritz Egea (Urretxu, 1984) laugarren postuan geratu da mundu mailako mendi lasterketen Skyrunning World Series txapelketan. Munduko mendi lasterketetako kirolari onenen artean leku bat egin du urretxuarrak Kilian Jornet, Luis Alberto Hernando eta Alex Nicholsen atzetik. Berriki Limone Sul Gardan (Italia) egindako Limone Extreme lasterketa izan da munduko txapelketako azkena. Bertan saio bikaina egin eta gero, hirugarren postuan amaitu du Egeak.
Mundu mailako laugarren postua eskuratu eta gero, ze sentipen dituzu?
Oso pozik nago. Dena den, denboraldi hasieran ez nuen halakorik lortzea espero. Zegama-Aizkorrikoa izan zen Skyrunning txapelketako lehenengo lasterketa. Bertan 10. postuan amaitu nuen eta mundu mailakoan lehenengo hamarren artean gelditzea zen orduan nire asmoa. Gero, Zermatteko (Suitza) Matterhorn Ultra-n zazpigarren geratu nintzen. Orduan hasi nintzen sinisten marka hobea egin nezakeela eta lehengo bost postuen artean gelditu nintekeela.
Munduko lasterketarako puntuagarria izan den Italiako ‘Limone Extreme’ izan da egin duzun azkena.
Skyrunning-aren barruan bost lasterketa egon dira aukeran, nik hiru egin ditut, eta Italiakoa izan da azkena. Egia esan, mundu mailako laugarren postuak baino gehiago poztu ninduen Limone Extrem-ean hirugarren egitea. Kilian Jornetekin batera korrika aritzea pasada bat izan da niretzat.
Elkarrizketa osorik bihar, Goierriko Hitzan.
