Zumarragarrak Hawaii-ko Ironmanean laugarren egin du 55 eta 60 urte artekoen mailan; distantzia luzeko proba hamar ordu azpiko denboran bete du, beretzat hori aldez aurretik «pentsaezina» zela dio
Josetxo Mujikarentzat (Zumarraga, 1957) kirola suhiltzaile lanak uzten dion denbora librean «eguneroko zeregin bat da». Triatloiak egiten hasi zen 28 urterekin, eta orain 13 urte Ibizan (Balearrak, Herrialde Katalanak) bete zuen bere lehenengo Ironman-a. Azken urteotan proba laburragoak egiten aritu da, astebururo ia, han eta hemen. Orain proba luzeagoak eta gogorragoak egiten ditu, urtean lauzpabost aldiz. Horien artean dago Hawaii-ko (Ameriketako Estatu Batuak) Ironman-a. Lanzaroteko Ironman-ean (Kanariak), «sorpresa» hartu zuen aurreko maiatzean Hawaii-en lehiatzeko txartela lortu zuenean.
Zer da Ironman bat?
Triatloi bat da. Igeriketan lau kilometro inguru, txirrinduan 180 bat kilometro eta maratoia korrikan –42 kilometro–. Ironman-ean egiten duzun lana bakartia da, ezin duzu ondokoaren gurpilaren atzetik joan. Triatloietan aritu baino lehenago duatloiak egiten nituen, izan ere igerian banekien baina ez nintzen hain trebea. Urteen poderioz igeriketan hobeto moldatzen naiz. Hala eta guztiz ere, Ironman-ean igeriketa proba ez da txirrindu zein korrika probak bezain erabakigarria.
Hawaii-ko Ironman-ak ba al du berezitasunik?
Ironman hori triatleten Meca da, han izateko dirua ez da nahikoa. Realarentzat Manchester-eko Old Trafford zelaian (Ingalaterra) jokatzea bezala da. Iaz Bolton-eko (Ingalaterra) Ironman-era joan nintzen, eta bizikleta matxuratu zitzaidanez ezin izan nuen proba amaitu. Arantza kentzearren, Lanzaroteko Ironman-ean parte hartzeko izena eman nuen. Zalantza egin nuen Hawaii-ra joateko txartela lortzeko bigarren sailkatu behar nintzelako, eta ez nuen erraz ikusten.
Elkarrizketa osoa bihar, Goierriko Hitzan
