San Martin auzoko bizilagunek antolatutako zozketan 960 euro bildu dituzte guztira aurten.
Urretxu San Martin egunean antolatutako zozketan jasotako dirua Nagarotera (Nikaragua) bidaliko dute aurten ere, Ilargi Beltza elkartearen bitartez. Urtero San Martin auzoko bizilagunek festa antolatzen dute azaroaren 11n.
Urretxun «tradizio handiko eguna» dela azpimarratu du Jon Altolagirre zinegotziak. Eta auzotarrek antolatutakoa denez «balio handiagoa» hartzen duen jaia dela gaineratu du. Aurtengo festari begira, eta eguraldiak gehiegi lagundu ez bazuen ere, «jende asko» gerturatu zen Gernikako Arbola plazara zinegotziaren ustetan. Iritzi berekoa da Luis Mari Perez, San Martin auzoko bizilaguna eta festaren antolatzaileetako bat. Izan ere, kontrakoa uste bazuten ere «aurten iaz baino diru gehiago» jaso dute urtero antolatzen duten bi urdaiazpikoren zozketan.
Haurrentzako sendagaiak
Zoriz edo kasualitatez 1.111 eta 711 zenbakiak izan dira aurtengo sarituak. Bi irabazleetatik bakarra agertu da, 1.111 zenbakiaren jabea, hain zuzen. Lourdes Auzmendik atzo jaso zuen irabazitako urdaiazpikoa, baita Ilargi Beltzak Nagarotetik ekarritako Sandinori buruzko liburua bat eta beste zenbait oroigarri ere.
Gaurko sari banaketa ekitaldian, urteroko moduan zozketan jasotako dirua Ilargi Beltza elkarteari eman zion Perezek San Martin auzoko bizilagunen izenean. Aurten, «960 euro bildu» dituzte guztira. Andoni Arostegi Ilargi Beltzako kideak esker onak helarazi ditu beste behin, urtero auzotarrek egiten duten ekarpenagatik. Aurten jasotako dirua haurrentzako sendagaiak erosteko baliatuko dutela azaldu du, «dengeak eraginda ehunka hildako eta gaixo asko» daudela azalduz.
