Aurrekontuak ez dituzte alderdi guztien adostasunarekin lortu, PSE-EEk eta PPk eman diete onespena
Zumarragan aurrekontuei buruzko osoko bilkurak Gabonen atarian izan ohi dira urtero. Hastear dagoen urteari dagozkion aurrekontuak aurkezteaz gain, udal gobernuaren kudeaketari buruz jarduteko bilkura izan ohi da eta hala izan zen atzokoa ere. 2014ko aurrekontuak onartu zituzten hiru ordutik gorako eztabaida baten ondoren. PSE-EEk eta PPk aldeko botoa eman zieten, EAJko zinegotziak abstenitu egin ziren eta Bildukoek kontra bozkatu zuten. Datorren urteko aurrekontua 13 milioi eurotik gorakoa izango da eta inbertsioak izango dira nagusi.
Zumarragako 2014ko aurrekontu orokorrek gora egin dute azken urtekoekin alderatuta. Agurtzane Basabe kontu-hartzaileak arrazoia azaldu du, «2009tik Foru Funtsa ordaintzen aritu gara. Dagoeneko amaitu dugu ordainketa eta milioi erdi euro inguruko haize freskoarekin osatu ditugu aurrekontuak». Basabek aurrekontuak «indartsuak» izan daitezen beste bi arrazoi eman ditu: «Azken urteotan ohiko gastuari eutsi diogulako aurrezki pixka bat ere bagenuen eta mailegu bat ere jarri dugu inbertsioak burutu ahal izateko». Maileguari buruzko ñabardura bat egin du, «beharbada aurreztutakoarekin moldatu ahal izango gara eta mailegua ez dugu erabiliko».
Inbertsio nagusiak eta alderdien adierazpenak bihar Goierriko Hitzan
