Aspirazio bidezko garbiketa egin diote, pipien aurkako tratamendua eman, eta afinatu egin dute.
Urretxuko Tourseko Martin Deunaren elizako organoak garai bateko soinua eta itxura berreskuratu ditu. Urteen joanen ondorioz musika tresnaren makineria hondatuz joan da, eta zenbait berrikuntza lan egin behar izan dizkiote guztiz hondatu aurretik. Lanak Del Campo y Turanzas Organeros Otxandioko enpresak egin ditu urria eta azaroa bitartean, eta 20 bat egunez luzatu dira.
Alejandro Turanzas, Del Campo y Turanzas Organeros enpresako kideak esan duenez, Tourseko Martin Deunaren elizako organoa 60. hamarkadan egindako musika tresna da. Baina daukan berezitasun nagusia «materialen zati handi bat, hoditeria eta kutxari dagozkionak, 1890eko organo batekoak» direla da.
Organoan hondatuen aurkitu dituzten piezak hauspoak izan dira, «behin behinean konpondu ditugu, baina hemendik 7-10 urtera berriz hondatuko dira», zehaztu du. Gainerakoan, «aspirazio bidezko garbiketa orokor» bat egin zaio, tutu guztiak desmuntatu eta gero. Egurrezko piezetan «pipiaren aurkako tratamendu» bat ere eman zaio eta hoditeria guztia garbitu dute. Garbiketa lanak amaituta, «tutuz tutu organoaren harmonizazio lanak» egin dituzte, behar bezala afinatuta uzteko. Amaitzeko «organoari azterketa pneumatiko-mekaniko orokor bat» egin diote.
