Aurrera begirako proposamenak ere adostu nahi dituzte, eta ‘otamotz.eus’-en aro berriaz hitz egingo dute.
Urretxuko eta Zumarragako Zintzo Mintzo euskara elkarteak urteko batzarra egingo du ostiralean. Zuzendaritza berriak martxa hartu zuenetik hiru urte igaro direla eta, elkartearen aro berriaz hausnartuko dute ostiraleko bilkuran. Bide batez, 2014ari begira dituen asmoen berri ere emango die zuzendaritzak elkarteko bazkideei, eta tartean etzi martxan jarriko den otamotz.eus atari berrituaz ere arituko dira.
2011n hartu zuen elkartearen ardura zuzendaritza talde berriak, eta ordutik bertako kide da Aitor Lizarazu zumarragarra. Lehenengo urte hura «trantsizio urte» modura planteatu zuten, eta helburu nagusia «Zintzo Mintzo Urretxuko eta Zumarragako taldeentzako topagune izaten jarraitzea» izan zen. Atzera begiratuta «maila berean» jarraitzen dutela aitortu du Lizarazuk, «ditugun helburuetan ez dugu gora egin, baina indar gehiago behar dugu».
‘Otamotz.com’-en aro berria
Aurrekoaren balorazioa egiteaz gainera, 2014ari begira dituzten asmoen berri ere eman nahi diete bazkideei. Zuzendaritza taldeak bere proposamena eramango du bilerara, baina «bazkideen ekarpenak ere jaso nahi ditugu asmoak guztien artean adosteko». Helburu nagusien artean orain arte egindako bideari jarraipena ematea izango da bat. Dena den, ateak irekita daude, batez ere «berritzera edo guri pentsaraztera datozen ideiei», gaineratu du Lizarazuk. Bilera Urretxuko Aizpurunea kultur etxean izango da, etzi 19:00etan hasita.
Etorkizun laburrari begira, ostiraletik aurrera otamotz.eus atariak «aro berri bati» ekingo diola aurreratu du Lizarazuk. Hain zuzen, web gune berritua eta aurrera begirako asmoak azaltzeko bilera egingo dute herriko elkarteekin, gaur 18:30ean hasita. Itxura aldaketa bat emango zaio, eta «Goierriko Hedabideaken gainerako web guneen plataformarekin bat egingo du». Atariaren eginkizuna «euskaldunak elkartzekoarena» da eta horregatik, Zintzo Mintzorentzat «estrategikoa da» Urretxu eta Zumarragarentzat.
