Zumarragako osoko bilkuran kaleak garbitzeko hurrengo esleipena Urretxurekin batera ez egitearen aldeko botoa eman dute PSE-EEk, PPk eta EAJk; Bilduko zinegotziak abstenitu egin dira. Azken esleipena elkarrekin egin zuten Urretxuko eta Zumarragako udalek, baina Mikel Serrano Zumarragako alkatearen hitzetan, «zerbitzua Zumarragan ez da guztiok nahi genuen modukoa izan». Dena dela, «erabakia Urretxurekin adostu» dutela azpimarratu du Serranok.
Udalak prestatutako baldintza orrien arabera kale garbiketa zerbitzuaren esleipena 517.000 euroan egingo dute; kopuru horri BEZ zerga gehitu behar zaio. Herenegungo osoko bilkuran Fernando Fariñas Zumarragako lan publikoen zinegotziak hitza hartu zuen, garbiketa zerbitzuan egingo dituzten aldaketak azaltzeko: «Langileentzat ez da aldaketarik egongo; guztiek beren lanpostuak gordeko dituzte. Zerbitzua optimizatzeko aldaketak egingo ditugu eta garbitzeko gehiago erabiliko dugu ura». Udalak ordaintzen duena %5 jaitsiko da aldaketa hauekin guztiekin.
Bide batez, Fariñasek garbiketa guneak bi alorretan sailkatu dituztela adierazi zuen, «gune batzuetan mantenu lanak egingo dira etengabean, eta beste taldean farola garbiketa zein larunbateko azokako zaborra jasotzeko edukiontziak jarri eta kentzeko lanak».
Lucia Okariz idazkariak zerbitzuaren gaineko azken xehetasunak eman zituen: zerbitzu berria apirilaren 1ean jarriko dute martxan eta prezioan ez dute bi urtean igoerarik egingo; ondoren, urte bakoitzari dagokion KPI igoko dute.
Kaleko pintaden arautegia
Iñigo Peñagarikano EAJko bozeramaileak jeltzaleek aldeko botoa emango zutela aurreratuta ere, kale garbiketa nork bere aldetik egitearen inguruko iritzia eman zuen: «Atzerapena da Urretxurekin egiten den elkarlanean, eta kezka sortzen digu», esan zuen.
Bilduko Xabier Barriolak koalizioak kale garbiketaren esleipenari buruzko informazioa aurreko ostiralean jaso zuela esan zuen. Hala, «behar bezala aztertzeko denborarik izan ez» dutela eta, abstenitu egin ziren. Barriolak, halere, «pintadak kentzeko irizpideen puntuak atentzioa eman» ziola gehitu zuen, «gobernuan dagoen taldeak erabakitzen duelako zer jarri eta zer kendu daitekeen». Barriolak gaiari buruzko udal arautegi bat eskatu zuen.
Mikel Serrano alkateak arautegi bat egon badagoela erantzun zion: «Pankartak jartzeko baimena eskatu egin behar dela dio arauak». Alkateak herriaren garbitasuna lehenetsi zuen, eta «bakoitzak bere ideiak adierazteko modu asko» dagoela erantsi zuen: «Garai batean udalak dirua ordaindu behar izaten zuen pintadak kentzeko», zehaztu zuen.
Pintaden harira udalbatzako alderdi guztiek adostutako adierazpen instituzionala irakurri zuten osoko bilkuran. Adierazpen horretan abenduaren 29an Zumarragako kaleetan PPren kontra agertutako pintada batzuen berri eman zuten.
Alderdi guztiak pintaden kontra azaldu ziren adierazpen horren bitartez eta Begoña Pereira PPko zinegotziari bere elkartasun osoa erakutsi diote. Pereirak elkartasun hori eskertu zuen.
PPren kontrako pintadak
Adierazpena talde guztien adostasunaren isla izan bazen ere, Mikel Serranoren hitz batzuek EAJko bozeramailearen haserrea piztu zuten. Serranok, hitz horietan, adierazpena bere modura berretsi zuen, eta Peñagarikano jeltzaleak adostasuna apurtu izana egotzi zion: «Badakizu hizki bakoitza adostu behar izan dugula eta egin duzun horrekin hitzarmena apurtu duzu». Barriolak Peñagarikanorekin bat egin zuen eta «ez da adostu duguna» esan zion alkateari. Serranok barkamena eskatu zuen.
Abortuaren legearen kontrako mozio bat ere aurkeztu zuten herenegungo osoko bilkuran. PPk ez beste alderdi guztiek Espainiako gobernuak aurkeztutako legearen kontra egin zuten mozioaren bitartez.
