2004ko otsailean ikusi zuen argia lehendabiziko Kk´inzona fanzineak, eta ondotik sortu zen izen bereko irrati librea. Azken hau FMko 98.0-n entzuten hasi zela bosgarren urteurrena ere beteko da aurten. Aritz Ormazabal Kk´inzona irratiko kidea da, eta hasieratik hartu du parte proiektu honen garapenean. Berak dioenez, «behar komunikatibo bat zegoela ikusita» hasi ziren ideia lantzen gaztetxean, «kontra-komunikazio bat egitea planteatu genuen, ohiko komunikabideetan agertzen ez zen hori azalarazteko, edo agertzen zena gure ikusteko modutik helarazteko». Fanzinea izan zen proiektuaren lehendabiziko emaitza, «hiru urtetan argitaratu genuen, maiztasun jakinik gabe».
Lehendabiziko pausoak
Gorputza hartzen hasita zegoen komunikazio proiektu hari jarraipena emateko irrati libre bat sortzeko ideiari bueltaka hasi ziren gero. Hala, orain zazpi urte Kk´inzona irratia internet bidez emititzen hasi zen. Garai berekoa da kunkkinzona.net web gunea ere, «internetez emititzeko beharrezko tresna» zelako. Bi urteko esperientziaren ondotik, internetetik uhinera saltoa emateko aukera aztertzen hasi ziren. Internet bidezko irratsaioak oso mugatuak ziren «jende gutxik entzuten zituen, eta konplexua zen emisioarekin bat egitea». Orain bost urtetik Kk´inzona irratia FM-ko 98.0-n entzun daiteke.
Azken bost urteetan «irratia egonkortuz joan da, gauzak beste modu batera egiten ditugu». Kk´inzona proiektu autogestionatua da eta «bazkideek ordaintzen duten kuotaren bitartez eta herrian antolatzen diren beste zenbait ekintzetatik ateratakoaz» finantzatzen da. Hurrengo hitzordu garrantzitsua Kk´inzona Eguna izango da, datorren martxoaren 15ean. Proiektua ezagutzera eman eta bazkide berriak erakartzeko asmoz egingo dena.
