Edozein gailu mugikorretan eta ordenagailu bidez Zumarragari buruzko informazio osoa jasotzeko GeoZumarraga plataforma sortuko dute. Udalak bultzatuta sortu dute, eta oraindik erabat amaitu gabe badago ere, martxan aurki jarriko dutela iragarri dute. Zumarragari buruzko informazioa bilduko dute bertan, merkatariena, jatetxeena, ostalaritza establezimenduena… Eta horiekin batera herrian antolatzen diren jardura guztiak ere bildu nahi dituzte.
GeoZumarraga programarekin, «Zumarraga bi eta hiru dimentsiotan nabigatzen den mapa interaktibo batean» bihurtu nahi dute, eta bertan «herrian dauden eskaintza guztiak ikusi ahal izango dira». Nahi duenak geozumarraga.net helbidean kontsulta ditzake eskaintza horiek denak.
Zortzi ataletan banatuta eskaintzen da informazioa webgune horretan: zerbitzuak, merkataritza gida, zer egin, non jan, non lo egin, ibilbideak, hirigintza eta ondarea. Atal bakoitzaren barruan, azpiataletan ordenatu dute informazioa, eta mapak, kale izendegia, irudiak… ere bildu dituzte. GeoZumarraga Zumarragako Udalak egindako udal geoinformazio zerbitzua da, eta helburua informatzea eta udal-lurraldearekin lotutako datuak hiritarretara zabaltzea da. Udalaren departamentu desberdinek eguneratutako informazio guztia aurkitu ahal izango da.
Ostalariak eta merkatariak
GeoZumarragako sortzaileek jakinarazi dutenez, berrikuntza bat ere badakar programak. Izan ere, herriko ostalariek eta merkatariek beraien establezimenduari buruzko informazioa mantendu, aldatu, berritu eta gehitu ahal izango du.
Hori egin ahal izateko, baina, «behar beharrezkoa izango da Zumarraga osatzen duten eragile guztien inplikazio aktiboa», GeoZumarragatik jakinarazi dutenez. Hori dela eta, «zerbitzu berri honetan parte hartzera» animatu dituzte herriko merkatariak eta ostalariak, bakoitzak berari buruzko informazioa eta berrikuntzak eguneratu ditzan.
Horretarako, nahikoa izango da GeoZumarraga webgunean dagoen merkataritza gida izeneko atalean sartu eta bertan zehazten den «zerbitzu profesional» atalean klikatzea. Bertatik aldatu edo sartu ahalko du norberak bere establezimenduari buruzko informazioa.
GeoZumarragatik jakinarazi dutenez, udalak balidatuko ditu datu horiek. Hala ere, norbaitek zalantzaren bat izango balu, webgunean bertan jaso ahalko du laguntzarako baliagarria izan zakiokeen informazioa.
Datozeen asteetan martxan
Webgunearen egileek jakinarazi dutenez, oraindik ez dago martxan GeoZumarraga ataria, baina hurrengo asteetan jarriko dute abian. Ordenagailu bidez edo beste edozein dispositibo mugikor erabilita Zumarragari buruzko informazio ugari eskuratu ahalko da.
Programaren inguruan sortu daitezkeen zalantzak eta arazoak jakinarazteko eta informazio gehiagorako, info@geozumarraga.net helbidera idatzi behar da.
