Euskal dantzak oinarri, Irrintzi dantza taldekoek munduko dantzak eramango dituzte etzi Zumarragako Zelai Arizti aretoko taulara. Munduko hainbat bazterretako dantza bertakoekin harilkatzeko ipuin bat asmatu dute. Ipuin hori dantza bidez kontatuko dute. Jaialdia 19:30ean hasiko da.
Urtean behin El Salvador auzoko entsegu gelatan ikasturtean zehar lantzen dutena kanpora ateratzen dute Irrintzi dantza taldekoek. Kanpora ateratzen dute Zelai Ariztiko taulara igota eta aulki guztiak betetzen dituzten ikusleentzat dantza eginez; aurten ere sarrerak agortu egingo dira. Dagoeneko banatu dituzte batzuk, eta banatzeko geratzen direnak etzi bertan hartu ahal izango dira aretoko leihatilan 18:30etik aurrera.
