Zumarragako Antonino Oraa kaleko Gazte Txokoan 6 eta 12 urteko haurrak hartzen dituzte astegunero. Umeekin zuzenean egiten duten lanaz gain, haurren inguruarekin hartu emana izatearen garrantziaren jakitun dira. Hori dela eta, eskolekin nahiz bestelako eragilerekin ekintzak egiten dituzte, baita gurasoekin ere. Gaur, 15:00etatik aurrera, bi hilean behin gurasoekin egiten duten foroari segida emango diote; oraingoan, etxeko lanak izango dituzte hizpide. Foroak ordu eta erdi iraungo du.
Gazte Txokoan haurrekin etxeko lanak, jolasak, eskulanak eta beste hainbat jarduera egiten dituzte. Gurasoekin egingo duten foroaz gain, urrian Gazte Txokoaren ateak zeharkatu, eta jolasak egingo dituzte Trintxeran (urriak 24). Halloween Festa egiteko asmoa ere badaukate (urriak 31). Trintxeran egingo dituzten jolasak Zumarraga jolasean proiektuaren baitan daude, iaz martxan jarri zutena. Helburuak jolas gune guztiak ezagutzea, eta Gazte Txokoa ezagutzera ematea dira.
Halloween Festan Gazte Txokoko bi taldeak elkartuko dituzte, 6-9 adin tartekoak eta 10-12 tartekoak. Gazte Txokoko hezitzaileek esan dutenez, «hileko ekintza guztiak haurrekin batera prestatzen ditugu eta egitarauaren berri ematen dugu auzoko parkeetan eta gizarte zerbitzuetan».
