Zumarragako Pintxo Lehiaketako epailea da eta asteburuko txapelketan parte hartuko duten hamabost ostalarien pintxoak dastatuko ditu gaur Bixen Egigurenekin eta Juanma Negredorekin.
Aurten hamabost ostalari aurkeztuko dira. Berritasunik ba al dago, zuk dakizula?
Aurten Antioko Interpretazio Zentroko jatetxeak ere parte hartuko duela da berritasuna. Urtero taberna berak izaten dira, hala izan da behintzat azken urteotan.
Zuek gaur eta bihar artean dastatuko dituzue pintxoak.
Bai, garai batean lehiaketa egunetan egiten genuen dastaketa, baina tabernariak ostiralean eta larunbatean buru-belarri arituko dira lanean; hori dela eta, dastaketa aurreratzea erabaki genuen.
Denetarik topatuko duzue. Asko landutako pintxoak eta pintxo errazagoak, ezta?
Pintxo lehiaketan izena ematen duten tabernen artean, alde batetik, sukaldari bat buru duten taberna-jatetxeak daude eta, bestalde, pintxoak bakarrik lehiaketa egunetan ateratzen dituzten tabernak. Batzuek zein besteek asko lantzen dituzte pintxoak eta sorpresak izaten ditugu. Dena dela, guztiek ez dute bezero piloa jasotzeko gaitasun bera. Pintxo lehiaketan 800 pintxo inguru ateratzen dituzte ordu gutxian, eta horri aurre egitea ez da lan erraza.
Pintxo bat dastatzen duzuenean, zeri ematen diozue garrantzia?
Inportantea da, noski, pintxoa goxoa egotea, baina ez da hori gure irizpide bakarra. Pintxoa egiteko erabilitako teknikak, ongi onduta egotea, originala izatea, ederki aurkeztea… Pintxoak osotasun bat izan behar du.
Asteburuan buzkantza edo odolkia erabili beharko dute derrigor. Zailagoa al da?
Gehienek odolkia erabiltzen dute buzkantza beharrean. Gure odolkia hotza eskaintzea zaila da gantz asko duelako eta, hotzean janez gero, eztarrian itsatsita geratzen zaizunaren irudipena daukazu. Odolki pintxo hotzak egitea zaila da, eta 400 pintxo bero segidan ateratzea ere bai. Gurean pintxo beroak egiten dituzte gehienetan, odolkiak baldintzatu egiten ditu, baita bero ateratze horrek ere.
Irudimenak ere izango du bere tokia.
Bai. Zumarragako kafetegi batek, adibidez, odolki pintxoa kafesne bat balitz bezala aurkeztu zuen behin.
Ezusteko gehiago hartuko zenituzten urte hauetan guztietan.
Bai, ostalari gehienek asko lantzen dute aurkeztuko duten pintxoa. Urtetan pintxo ohikoa atera, eta halako batean pintxo apartarekin txunditu gaituzte. Oro har, lehiaketaren harira asko lantzen dituzte pintxoak.
