Ezker abertzaleko egiturak berrantolatzea eta ETAri laguntza ematea egotzita, atzo hastekoa zen 35 euskal herritarrem kontrako 04/08 sumarioko epaiketa; horien artean da Peio Galvez zumarragarra. Auzitegi Nazionalera joan ziren auzipetu guztiak. Baina aurreko orduetan Guardia Zibilak martxan jarritako Mate operazioan 16 lagun atxilotu eta gero, horietako gehienak abokatuak, epaiketa bertan behera gelditu zen. Izan ere, 35 auzipetuetatik 19 abokaturik gabe gelditu ziren, eta “defentsa eskubidea urratu” zaiela argudiatuta, epaiketa atzeratzeko eskatu zuten.
Hori guztia salatzeko eta Peio Galvez herritarrari elkartasuna adierazteko, elkarretaratzea egin zuten atzo Zumarragan. Epaiketa politikorik ez, Free Peio Libre lemapean dozenaka herritar bildu ziren. Epaiketa hori eta atzo izandako atxiloketak salatzeko, beste bilkura bat egingo dute gaur, 19:30ean, Potros plazan.
