Urtarrila karta jokoen hilabetea izan ohi da Zumarragako Gure Txoko jubilatuen egoitzan. Astetan banatu dituzte jokoak, eta herenegundik tutean ari dira hamasei bikote. Musean, briskan eta punttuan ere jokatuko dute. Horiez gain, billar, toka, igel-toka eta dominoa dira jubilatuetan egiten dituzten beste txapelketak.
Musean ez beste karta joko guztietan emakumezkoen presentzia gizonezkoena bezainbestekoa da, «erdi eta erdi», dio Miguel Angel Cenera Gure Txokoko lehendakariak, «musean, ordea, gizonezkoak dira gehienak; baliteke ohitura kontu bategatik-edo izatea».
Bikoteka aritzen dira eta partida bat galduz gero, txapelketatik kanpo geratzen dira zuzenean. Guztira, ehun bat lagun aritzen dira joko hauetan guztietan. Lehian arituko diren bikoteak zozketa bidez ateratzen dituzte. Jokoan hasi aurretik arauak ezartzen dituzte gaizki ulerturik egon ez dadin.
Binaka edo bakarka
Sariak martxo hasieran emango dituztela aurreikusi du Cenerak, «behin txapelketa guztiak amaituta». Billarrean, igel-tokan, dominoan eta tokan bakarka aritzen dira. Igel-tokan eta tokan Euskadi plazako arkupeetan jokatzen dira. Denera, karta jokoen modalitate ezberdinak barne, bederatzi jokoetan arituko dira Zumarragako jubilatuak binaka nahiz bakarka.
Urtero egiten badituzte ere, egutegian data zehatza izan ohi dute karta eta bestelako joko hauek. Horiez guztiez gain, jubilatu etxean astero egiten diren jardueretan ehun eta hogei bat jubilatu aritzen dira. Esaterako, antzerki taldean –bi daude dagoeneko–, yoga ikastaroan, sevillana taldean, euskal dantzen taldean, koruan, jota taldean eta abar.
Gure Txokoko jarduera horien guztien memoria aurkeztuko dute bihar egitekoak diren urteko batzar orokorrean. Batzarrean iazko kontuak aurkeztuko dituzte eta, bide batez, egoitzari buruzko informazio orokorra emango dute. Jubilatu etxeko lehendakaritzan ez da aldaketarik egongo.
