Zumarragako gaztelaniazko irakurle taldearen gidaritza bere esku hartuko du Leivak (Badalona, Herrialde Katalanak, 1978). 20 bat kide ditu taldeak, baina dozena bat dira hilero biltzen direnak.
Orain artean gaztelaniazko irakurle taldeko kidea izan zara. Aurrerantzean dinamizatzaile lanak egingo dituzu. Nolatan?
Jose Luis Canchok utziko zuela esan, eta dinamizatzaile lana nire gain hartzea proposatu zidan. Baiezkoa eman nion taldeko kideekin hitz egin eta gero. Niretzat, oraindik eta gehiago irakurtzeko aukera da.
Jose Luis Canchoren bideari jarraituko diozu?
Canchoren ekarpena itzela izan da. Narratiba eta literatur entseguak irakurri ditugu, batik bat. Liburu bikainak eta nahiko ezezagunak jarri ditu gure eskuetan, berekin benetako altxorrak irakurtzeko aukera izan dugu. Gauza txikien literaturan murgildu gaituela esango nuke. Nik, nire aldetik, ezin dut berak bezainbeste ekarri literatur kalitatearen esparruan, baina nire begirada gehitu diezaioket taldearen jardunari.
Nolako begirada da zurea?
Ni emakumea naiz eta emakumeek idatzitako literatura gehiago irakurtzen dut. Ni bidaiaria naiz eta munduko literaturari ateak zabaldu nahi dizkiot. Kazetaria naiz eta gai sozialak zein politikoak interesatzen zaizkit. Generoetan ere aukerak zabaltzeko asmoa daukat.
Taldearen dinamikan aldaketak egingo al dituzu?
Nire asmoa zikloak antolatzea da. Hiru hilabeteko iraupena izango dute eta taldekideen interesen arabera gaiak aukeratuko ditugu. Antolaketa honek liburua nola idatzita dagoen aztertzeaz gain, liburuaren inguruan saretzen diren gertaera historikoei nahiz sozialei buruz hitz egiteko aukera emango digu.
Euskarazko irakurle talde bat ere badago. Irakurle bat baino gehiago bietan aritzen da. Hartu emanik ba al dago?
Bi taldeak osagarriak izan daitezke eta loturak sendotu daitezkeela uste dut. Finean, irakurle talde bat kulturaz hitz egiteko aitzakia da. Gure taldeko kide bat baino gehiago sortzailea da, hala pinturan nola literaturan. Taldea beren sormen lanari bide emateko gunea eta, aldi berean, gure inguruan kulturari lotuta gertatzen ari denari buruz jarduteko esparrua izan daiteke.
