Igandean, mendi lasterketetako euskal selekzioko kideak Urretxura eta Zumarragara etorriko dira. Euren asmoa UZ Trail lasterketaren ibilbide berria ezagutzea da eta nahi duten zaletu guztiek ibilbidea eurekin osatzeko aukera edukiko dute. 08:45ean elkartuko dira, Areizaga-Kalebarren plazan.
Aritz Egea urretxuarra selekzioko kidea da eta gainontzeko kideek bere eskutik ezagutuko dute ibilbidea. Hassan Ait Chau, Iban Letamendi, Leire Agirrezabal, Aitziber Ibarbia eta Uxoa Irigoienek korrika egingo dute Egearekin batera. Elena Calvillo beasaindarra eta Jokin Lizeaga ere selekzioko kideak dira, baina ez dute igandeko entrenamendu saiora etortzerik izango.
Selekzioko hautatzaileak Eneko Aliende eta Iñaki Uribe-Etxeberria dira. Selekzioko korrikalariek, inguruko proba gehienetan parte hartzeaz gain, mundu mailako proba garrantzitsuenetan aritzen dira. Aurten ere puntan ibiltzea espero dute. Erronka nagusia Zegama-Aizkorri mendi maratoia izango dute.
Selekzioko kideek entrenamendu saio bat egingo dute, erritmo lasaian. Nahi duten guztiek parte hartu ahal izango dute. Selekzioko kideek aholkuak emango dizkiete. Ibilbidean zehar anoa postuak egongo dira. Parte hartzea doakoa da eta ez da izena eman behar.
Korrikalariek UZ Trail lasterketako ibilbide berria ezagutzeko aukera edukiko dute, gainera. Lasterketa hau maiatzaren 23an izango da.
Berrikuntza asko izango ditu. Hasteko, izena aldatu diote «erakargarriagoa» egiteko. Orain arte Goierri Garaia Mendi Lasterketa zuen izena eta hemendik aurrera UZ Trail izena izango du.
Ibilbidean egindako aldaketei dagokienez, antolatzaileak «gustura» ageri dira. «Aurreko urteetan parte hartzaile asko kexu agertu dira, gure lasterketan pista eta asfalto asko zegoelako. Aurtengo ibilbideak ez du aurrekoarekin zerikusirik izango, oso asfalto gutxi izango baitu».
Orain arte baino gogorragoa izango da, gainera. «Gure mendietan, tamalez, ez dago kilometro bertikalak egiteko aukerarik. Baina Izazpi eta Irimo mendiak alderik pikoenetatik igoko dira eta horrek gogortasuna areagotuko du».
Aurtengo probak 22 kilometroko luzera eta 1.600 metroko desnibel positiboa izango du. Larunbat arratsalde batean egingo da, udal eta foru hauteskunde egunaren bezperan, «udaberriko garai ederrenean».
Beti bezala, ibilbide motzago bat ere prestatu dute 22 kilometrokoa egiteko adina entrenatu ez dutenentzat. Ibilbide motzekoak ez dira Irimora igoko. Izen-ematea dagoeneko zabalik da, kirolprobak.com webgunean.
Txip horia duten federatuak 15 euro ordaindu behar dute eta ez dutenek, 17. Txip horidun federatu gabeek 17 euro ordaindu behar dute eta txip horia ez duten federatu gabeek, 19.
Sariak eta zozketak
Anoa postuak Belokiko iturrian, Areizaga-Kalebarren plazan eta zazpi puntetan egongo dira. Amaieran, parte hartzaile guztientzat janaria eta edaria egongo dira.
Sariei dagokienez, lehen bost emakumezkoentzat eta lehen bost gizonezkoentzat sariak egongo dira. Gainera, opariak zozkatuko dituzte korrikalari guztien artean. Lasterketa 16:00etan hasiko da eta eta sari banaketa ekitaldia 20:00etan izango da.
