Urretxuko udaletxeko atarian Cartooning for peace erakusketa ireki dute. Gaurkotasun handia duen erakusketa da, bisitariari giza eskubideei eta adierazpen askatasunari buruz hausnartzeko gonbita luzatzen baitio. Panelak hilaren 27a arte egongo dira Urretxun eta 3. eta 4. DBHko ikasle guztiak erakusketatik pasako dira. Gaiari buruz hausnartuko dute, proiektuaren koordinatzaileekin: Aintzane Gamiz legazpiarra eta Jokin Esnaola.
Erakusketaren jatorria 2006ko gertaeretan dago: Danimarkako marrazkilari bat mehatxatu egin zuten Mahoma marrazteagatik eta Kofi Annan NBEko idazkari nagusiak mundu osoko marrazkilariak deitu zituen erakusketa bat egiteko. Urretxukoa bezalako 40 erakusketa daude munduan.
Gipuzkoara Aldundiaren eskutik heldu zen, irailean. Koldo Mitxelenan estreinatu zuten eta arrakasta izan zuen. Gainera, Mattin, Asisko Urmeneta eta Cesar Oroz marrazkilariek ekimenarekin bat egin zuten eta gaiari buruz hausnartu zuten.
Urretxun hamar panel jarri dituzte eta bakoitzean gai bat aztertzen da: zentsura, Interneten eginkizuna, arrazakeria, Ekialde Hurbila, emakumeen eskubideak, prentsa marrazkiak, marrazkiak eta erlijioak, planetaren salbazioa eta umorearen mugak.
Aurkezpena
Erakusketa atzo aurkeztu zuten. Ekitaldian, Gamiz eta Esnaolarekin batera, Urretxu eta Zumarragako alkateak egon ziren: Oihane Plazaola eta Mikel Serrano. Zabaletak eta Serranok eskerrak eman zizkieten Aldundiari erakusketa Urretxu eta Zumarragara ekartzeagatik eta herritarrei bertaratzeko gonbita luzatu zieten. «Puri-purian dagoen gaia da eta ekimen honek gazteekin heziketa lana egiten eta hausnartzen lagunduko digu», esan zuen Zabaletak.
Gamizek Aldundiaren Bizikidetza Planaren baitan antolatu dutela esan zuen. «Elkarbizitza eta oroimen historikoa bultzatzeko egitasmoak abian jarri ziren, baina gazteentzako zerbait falta zela ikusi zen».
Erakusketatik 3. eta 4. DBHko ikasle guztiak pasako dira. Gaiaren inguruan hausnartuko dute eta giza eskubideekin lotutako mural bat marraztuko dute. Erakusketa, astelehenetik ostiralera 17:00etatik 19:30era egongo da zabalik eta larunbat eta igandetan 12:00etatik 14:00etara.
