Urretxuko Udalak herrigunea auzoekin lotzen dituen Auzobusa doan izango dela jakinarazi du. Bestalde, Zumarragako ospitalean eta anbulatorioan geldialdiak egiteko baimena eskatu behar dutela esan dute eta Zumarragako Udalaren jarrera salatu dute. Zumarragak gaur bere autobusa aurkeztu behar du eta urretxuarrek behin baino gehiagotan zerbitzu bateratua eskaintzeko proposamena luzatu dietela esan dute. Urretxuko autobus zerbitzuaren lehentasuna auzoetako bizilagunei eta mugikortasun arazoak dituztenei (adineko jendeari eta haur txikiak dituztenei) laguntzea da.
Urretxuko Udalak 2013ko irailean jarri zuen martxan Auzobusa, gaia herritarrekin aztertu ondoren. «Zumarragarekin elkarlanean abiarazi beharreko egitasmoa zela planteatu zen eta horrela jakinarazi zitzaion Zumarragako Udalari, behin baino gehiagotan».
Hala, Urretxuk bere aldetik ekin zion. 10 euroko bonuak atera zituzten, baina 65 urtetik gorakoek eta mugikortasun arazoak dituztenek ez zuten ordaintzen. Handik urtebetera erabiltzaileekin balorazioa egin zuten. «Zerbitzua hobetu genuen, erabiltzaileen ekarpenak kontuan hartuz. Ordutegiak aldatu genituen eta bidaiak eta geltokiak gehitu. Labeaga kalean bi geraleku jarri genituen eta zerbitzua larunbat eguerdira luzatu genuen. Horrekin batera, bonua 3 eurora jaistea erabaki genuen», adierazi dute udal ordezkariek.
Balorazio honetan ere Zumarragarekin elkarlana «derrigorrezkotzat» jo zen. «Bigarren idatzi bat bidali genion Zumarragako Udalari, elkarrekin lan mahai bat osatzeko eta bi herrien arteko ibilbidea diseinatzeko. Tamalez, oraindik ez dugu erantzunik jaso».
Bigarren balorazioa
Berriki, bigarren balorazio bat egin dute. «Zerbitzuari egonkortasuna eman behar zaiola iruditzen zaigu. Zerbitzua ematen duen enpresarekin erabiltzaile kopuruaren gaineko neurketa bat egin dugu eta emaitza positiboa izan da. Erabiltzaile kopurua gehitzeko tartea ikusi dugu. Era berean, erabiltzaileei inkesta bat luzatu diegu eta erantzunak oso positiboak izan dira». Erabiltzaile gehienak herrigunetik kanpo bizi diren emakumezkoak dira.
Balorazioa Ingurumen batzordera eraman dute eta honek erabaki hauek hartu ditu: zerbitzua mantenduko dute, astelehenetik aurrera herritar guztientzat doanekoa izango da eta, Zumarragako Udalaren erantzunik jaso ez dutenez, anbulatorioan eta ospitalean geldialdiak egiteko baimena eskatuko diete Eusko Jaurlaritzari eta Zumarragako Udalari.
