Arabar Errioxan barrena ibilaldia antolatu du Ostadar mendi taldeak iganderako. Oiondik irtenda, mahasti eta partzela-bide artean Guardiako hiribilduko bidean ibiliko dira. Ibilbide guztia ia laua da oraingoan.
Ostadarrekoek, ohi bezala, ibilbidean zehar mendizaleek ikusi ahal izango dituzten gune interesgarrien berri eman dute, hala nola: Mantible zubi erromatarra, Asa herrixka, mahasti-etxeak, Ebro errekaren bazterrak, Carravalseca eta Carralogroño urmaelak eta Guardia herria bera; muino batera igota, herri arabarraren kale estuen azpian gordetzen dira bertako upategiak.
Irteera 07:00etan egingo dute Zumarragako postetxearen aurretik. Izena emateko Zumarragako Zelai Arizti kultur etxean duten egoitzara jo daiteke bihar eta etzi 20:00etatik 21:00etara. Telefonoz (943 72 33 85) eta e-postaz (ostadar@ostadar.org) ere egin daiteke izen-ematea.
