Xabier Erostarbe pilotari urretxuarrak Goñiren omenezko txapelketako final laurdenetako partida jokatuko du gaur, 18:30ean, Zumarragan. Eneko Ioldi nafarrarekin jokatuko du.
Eneko Ioldirekin Dorronsoro eta Imazen aurka jokatuko duzu. Zer nolako partida espero duzu?
Sekula ez dut Ioldirekin jokatu. Bere aurka, ordea, bai. Aurten, Lezaman. Bikotekide ona da. Afizionatu mailan txapel gehien irabazi dituen pilotaria da, beharbada.
Faboritoak zaretela esango al zenuke?
Zaila izango da txapelketa irabaztea, bikote oso onak baitaude. Gure mailan onena ematen eta ahalik eta urrutien heltzen saiatuko gara. Urbieta-Perez eta Santxo-Erasun ondo ikusten ditut. Irabazi nahi badugu, gure maila eman beharko dugu.
Zenbat aldiz jokatu duzu Goñiren omenezkoa?
Aurten hirugarrengoz jokatuko dut. Duela bi urte, Urbietarekin, finalerdietara heldu nintzen. Iaz, berriz, Artolarekin, finala jokatu nuen.
Iazko finala jokatu zutenetako hiru profesionaletan daude orain. Zu bakarrik falta zara.
Amezketako Zazpi Iturri klubarekin jokatzen dut eta azkenaldian taldekide asko profesional mailara pasa dira. Azkena, Irribarria. Asko pozten naiz beraiengatik. Irribarriak udan salto egingo zuela uste nuen, baina itxuraz enpresak bere beharra zuen. Goñiren omenezkoa berarekin jokatu behar nuen.
Artola eta Altuna, iaz Goñi txapelketako finala jokatu zuten zure taldekide ohiak, sekulako maila ematen ari dira profesionaletan.
Argi zegoen oso maila ona emango zutela. Altuna egin gabe dago oraindik, baina teknikoki oso ona da. Artola, berriz, oso indartsua da.
Zuk noiz eman behar duzu saltoa?
Ez dakit. Hori ez dago nire esku. Ez didate ezer aipatu.
Profesionalekin entrenatzen al duzu?
Aspeko pilotariekin entrenatzen dut, baina profesional mailara igotzea beste kontu bat da. Ahalik eta maila onena ematen saiatuko naiz. Profesionaletara salto egiten badut, ondo, baina bestela ere jokatzen jarraituko dut.
Zer moduz doa urtea?
Ondo. Gainera, astebete egon naiz San Franciscon. Euskadiko txapelketa irabazteagatik ematen duten saria da. Oso esperientzia ona izan da. Toki oso polita da. Primeran hartu gaituzte. Bi partida jokatu ditugu hango Euskal Etxean.
Zeintzuk dira zure hurrengo erronkak?
Goñiren omenezkoaz gain, Euskal Liga eta Soroa txapelketa jokatzen ari naiz: Euskal Liga Irribarriarekin eta Soroa Arteagarekin.
Duela urtebete, GoiBerri aldizkarian, irregular samarra zinela aitortu zenuen. Azken urtebetean hobekuntzarik nabaritu al duzu?
Zenbat eta partida gehiago jokatu, hobe. Gainera, zaharragoekin jokatuz asko ikasten da. Izan ere, atzelarioi gehiago kostatzen zaigu egitea.
