Diru errazaren promesa ustela, pantailan dir-dir egiten duten gonbite koloretsuak, apusturako gosea, bakardadea eta asperdura izan daitezke apustudun jokoen mendekotasunaren osagaiak. Internet, egun, sozializaziorako agora bilakatu da. Plaza horretan, baina, apustudun jokoei lotutako arrisku bat baino gehiago dagoela diote adituek. Deustuko Unibertsitateko Izaskun Sarabia ikertzaileak Teknologia berriak eta apustudun jokoak nerabezaroan: ezagutzen ote ditugu arriskuak? hitzaldia egingo du bihar Zumarragako Zelai Arizti aretoan, 18:00etan.
Orain hiru urte, Urretxun eta Zumarragan nerabeekin maila batean edo bestean lanean ari diren zenbait eragilek lantalde bat osatu zuten. Gazte Bidean aisialdi gunea, kaleko hezitzaileak, osasun zentroko profesionalak, udaltzaingoak, ertzainak, eskolako irakasleak… Guztien artean nerabeei lotutako zenbait gai landu, eta gurasoekin nahiz nerabeekin jorratzen dituzte. Testuinguru horretan antolatu du lantalde horrek biharko hitzaldia.
«Mendekotasunik ez nozitzeko ezinbestean
muga jarri behar zaie denbora eta diruari»
Izaskun Sarabia (Gizarte hezitzailea)
Sarabiak, nagusiki, Internet bidezko on line jokoetan jarriko du arreta. Dioenez, «nerabezaroan ohitura osasuntsuak finkatzen dira eta gai hauek orduan lantzea inportantea da. Jokatzen duten guztiak ez dira ludopatak, baina mendekotasunik ez nozitzeko ezinbestekoa da jokoari denbora zein diru muga jartzea».
Sarea beti ‘zabalik’
Interneten dirua erraz irabazi daitekeenaren ideia zabaltzen dutela dio, «modu jostagarrian jokatu daitekeela eta dirua erraz irabazi daitekeela saltzen dute». Bere ustez, dirua azkar irabazi daitekeenaren mezuaren eta jokoaren aurkezpen berak jokatzera gonbidatzen ditu, bereziki, nerabeak. «Horrez gain, oso-oso eskura dituzte apustudun jokoak; izan ere, sarea beti dago zabalik, ordu oro eta egunero».
Mendekotasuna nozitu dezakeenaren soslaia eta gurasoei gaiari buruzko informazioa eman, hezkuntzaren garrantzia, jokatzeko moduak, ageriko zein ezkutuko arriskuak, nora jo dezaketen eta atentzioa zeri eman behar zaion azalduko ditu, besteak beste, Sarabiak hitzaldian.
