Eskoriatzan jaio eta Zumarragan hazi zen. Hamabost urte zituela Madrilera bizitzera joan, eta sustraiak puskatu zitzaizkion Yonka Zarcori: «Deserrotzea ez dut inoiz gainditu. Franco hil zen urtean joan ginen Madrilera. Sasoi hartan dena airean zegoen». Sustrai haiek utzitako apurrekin Ultimos días en el limbo eleberria idatzi du eta Zumarragan aurkeztuko du datorren asteartean, martxoak 24, Zelai Arizti kultur etxean, 19:30ean. Izan ere, liburua Zumarragan girotu du Zarcok.
Hezur-haragizko pertsonaiekin eraiki du nobela. Hain zuzen, Zumarragako kuadrillako lagunekin bizi izandako pasadizoekin osatu du eleberriaren mamia. Haurtzarotik nerabezarorako pasabidean dagoen lagun taldearen bizipenak oinarri ditu eta Francoren diktadura du testuinguru. Autobiografiatik asko duen narrazioan adiskidetasunari, maitasunari, galerei, errebeldiari eta kontzientziari tokia egin die.
Cordoban bizi da egun Zarco. Dioenez, ilusio handiz bizi du Zumarragara egingo duen itzulera, «urteotan egon naiz Zumarragan, baina behin ere baldintza normaletan. Nik liburua bertan aurkeztu nahi nuen. Dena dela, ez nuen uste halako oihartzunik sortuko zuenik dagoeneko han ere liburuak saltzen ari direla jakin baitut».
Zarco musikaria da. 1990ko hamarraldian arrakasta izan zuen Corazones Estrangulados taldearekin. Orain taldea berriz elkartu, eta bira bat egitekoak dira.
Idazle sena 50 urte bete ondoren piztu zaiola dio, «hasi nintzenetik ez dut idazteari uzteko modurik aurkitu. Bizitza zoroa izan dut eta oraindik badut zer kontatu». Bigarren eleberria idazten ari da.
