Gaur goizean Beasain-Durango errepidearen Urretxu-Antzuola zatia inauguratu dute. Errepidea 15:30etik aurrera izango da zabalik ibilgailuentzat. Errepide zati honek 2,7 kilometro ditu, tartean 700 metroko tunela. Inaugurazio ekitaldian Martin Garitano ahaldun nagusiak, Larraitz Ugarte Mugikortasuneko eta Bide Azpiegituretako diputatuak, Oihane Zabaleta Urretxuko alkateak eta Mikel Serrano Zumarragako alkateak parte hartu dute.
Errepide berriaren kostua 55 milioi eurokoa izan da. Garitanok eta Ugartek aurreikusitakoa baino %16 gehiago “bakarrik” kostatu dela azpimarratu dute. Baita aurreikusitako epean inauguratu dela ere. Ugartek Antzuola-Bergara zatiko obran sortutako arazoak direla eta, obra gelditu egin dela eta berriro esleituko dutela aipatu du. “Laster irekitzea espero dugu”, gehitu du.
