Urteroko moduan, Trinitate egunez erromeria egingo dute igandean Oleta mendian, Oleta Elkarteak antolatuta. 10:30ean elkartuko dira Agiñan, eta denak batera igoko dira Oletara. Bertan meza emango dute eguerdian, auzoan hil direnen alde. Meza ondoren auzoko aizkolarien erakustaldia eta ahari jokoa izango dira.
Txozna ere jarriko dute Oletan, eta edariak eta bokatak emango dituzte. Herri bazkaria 14:00etan izango da, eta trikitilariek girotuko dute bazkalostea. Arratsaldean erromeria egingo dute, eta 20:00etan Agiñara itzuliko dira. Eguraldi txarra eginez gero, ekitaldi guztiak Agiña auzoan egingo dituzte.
