Iñaki Beitiaren Omenezko mendi martxa egingo dute etzi, igandearekin, hemeretzigarrenez. Mila bat lagunen parte hartzea espero dute antolatzaileek. Goierrikoak zein Hego Euskal Herrikoak dira izen-ematea aurrez egin duten gehienak; 600 lagunek eman dute izena jada. Herrialde Katalaneko bost parte hartzaile ere egongo direla aurreratu du Jonmikel Intsausti antolatzaile taldeko kideak.
Antolaketa taldea da, hain zuzen, mendi martxaren bihotza parte hartzaileekin batera. Hemeretzi urte hauetan guztietan Urretxuko eta Zumarragako eragile, erakunde nahiz norbanako ugari elkartu baita Iñaki Beitia zenaren omenezkoaren lantaldean. Guztira, 100 bat lagun aritzen dira aurrez zein martxaren egunean bertan.
Luis Albisua antolatzaile aritzen da eta berak dioenez, «aurten ez dugu berrikuntza handirik egin, baina berrikuntza txiki bat baino gehiago dago». Aldaketak daude ibilbidean aurreko urteetako bideekin alderatuta. Aurten Etxaburutik gora egingo dute zorbide bat —lur jabeen bideetatik igarotzen den bidea— hartuta. Handik igoko dira Neberara eta Gorlako mendateraino iritsi eta gero, Elosumendira egingo dute. «Aurretik ez dugu han eguraldiarekin zorterik izan eta berriz saiatu nahi dugu bide horrekin ea eguraldiak laguntzen digun», dio Albisuak.
Oletatik ere igaroko dira mendizaleak eta han etzi ospatuko duten Trinitate jaiarekin bat egingo dute. Aizpurutxon azken urteotan bezala Euskaraz Biziko bandera eskuetan euskaraz bizitzearen aldeko argazkia egiteko aukera egongo da. Hondakinak gaika bereizteko eskaera egin dute eta baliabideak jarriko dituzte kontrol guneetan.
Elkartasunerako tartea
Markel Lopez urretxuarrari laguntza emateko deia egin dute Beitiaren antolatzaileek eta plastikozko tapoi bilketari hauspoa eman nahi diote mendi martxaren ekitaldi honetan. Horrez gain, aurreko urteetan opari gisa ematen dituzten elastikoak Nikaraguara bidali dituzte Ilargi Beltzako kideen bitartez eta aurten ere hala egiteko asmoa dute.
Martxaren baitan IV. Argazki Rallya antolatu dute eta saria bi lagunentzat bertako jatetxe batean afaria izango dela iragarri dute. Azken urteetan ez du parte hartze handirik izan, baina antolatzaileek egitasmoari eutsi diote eta mendizaleei parte hartzeko gonbitea luzatu diete, izan ere, jakin badakite batek baino gehiagok argazki kamera aldean eramaten duela martxaren egunean.
Gurutze Gorrian laguntza izango dute; kontrol guneetan egongo dira eta ibilbidean zehar zer edo zer gertatuz gero, mendizaleak artatzeko prest egongo direla bermatuta dago. Txakurrak eramatekotan lotuta eramatea eskatu dute zorbideak iragango dituztelako. Anoa-postuetan mokaduak eta edariak banatuko dituzten arren, mendizaleei edatekoak eta janari energetikoak eramatea gomendatu diete.
