Zumarraga eta Urretxuko udalek 27. Lore Sariketa antolatu dute. Egitasmo honen helburua da, bi herrietako balkoi, leiho eta baserrietako sarrerak loreekin apainduz Urretxuri eta Zumarragari itxura atseginagoa ematen dieten bizilagunak saritzea eta ohitura on hori herritarren artean zabaltzea.
Epaimahaiak ekainaren 22tik uztailaren 1era bitartean ikusiko ditu leihoetan, balkoietan eta baserrien sarreretan jarritako loreak. Ondoren, lore apainketa ederrenak saritzen saiatuko da. Sari banaketa ekitaldia uztailaren 10ean izango da, 12:00etan, Zumarragako Zelai Arizti kultur etxean. Hamasei sari banatuko dituzte: kaleko balkoi eta leihoen artean hamar eta baserrien artean beste sei. Saritu bakoitzak 50 euro, diploma eta oparia jasoko ditu.
Sariketa, ez lehiaketa
Urretxuko eta Zumarragako udalek sariketa bat dela azpimarratu nahi dute, ez lehiaketa bat. «Gure helburua herritarrak bi herriak zaintzera eta apaintzera animatzea da eta ez lehia bultzatzea. Horrenbestez, ez dugu mailarik bereiziko sarietan eta aukeratutako balkoi, leiho eta atariak era berean sarituko ditugu. Oraingo honetan ez dugu lehiaketarik egingo eta interesa eta ahalegina sarituko ditugu. Beraz, aukeraketa egiterakoan ere, bi gauza horiek baloratuko ditugu gehien».
