Urretxu eta Zumarragako udalek narratiba, poesia eta bertsopaperetako Iparragirre lehiaketako oinarriak aurkeztu dituzte. Lanak urriaren 10a baino lehen aurkeztu behar dira, bi herrietako kultur etxeetan. Sarituen berri abenduan emango dute, bi udaletako webguneetan eta zelaiarizti.com-en.
Lanen luzerari dagokionez, narratiba lanak sei eta hamabi orrialde artekoak izan behar dira. Poesia lanek, berriz, 200 lerro baino gehiago eduki behar dituzte. Bertsopaperen atalean, bi maila egongo dira: 16 urte artekoena eta 16 urtetik gorakoena. 16 urte arteko parte hartzaileek gutxienez sei bertso aurkeztu behar dituzte eta gehienez hamar. 16 urtetik gorako parte hartzaileek, berriz, gutxienez zortzi bertso idatzi behar dituzte eta gehienez hamabi.
Sei saritu egongo dira: euskarazko narratiba lan onena, euskarazko poesia lan onena, gaztelerazko narratiba lan onena, gaztelerazko poesia lan onena, 16 urtetik gorako batek egindako bertsopaper onenak eta 16 urtetik beherakoen bertsopaper onenak. Lehenengo bostek 500n euro jasoko dituzte diru saritan eta azkenak 100 euro.
Epaimahaiaren erabakia eta sari banaketa ekitaldiaren eguna eta tokia abenduan emango dituzte ezagutzera, Urretxu eta Zumarragako udalen webguneetan eta zelaiarizti.com-en.
