Zumarragako Ospitalea ireki zutela 30 urte bete direnean, ospakizunei amaiera emango diete ekainean. Zumarragako Ospitalea eta bere ingurua argazki lehiaketa antolatu dute, eta hilaren 26an bazkaria egingo dute Antioko jatetxean.
Argazki lehiaketan edonork parte hartu dezake. Irudietan ospitalea zein bere ingurunea agertu beharko dira, hala egungo argazkiak nola iraganekoak utzi daitezke ekainaren 13ra bitartean. Lanak honako helbidera bidali behar dira: OSI.GAUBERRIAK@osakidetza.eus. Parte hartzaile bakoitzak hiru argazki aurkeztu ahal izango ditu gehienez.
Argazkiak Facebooken
Epaimahaiak hamabi argazki aukeratuko ditu. Ondoren, hamabi argazki horiek ospitalearen Facebookean erakutsiko dituzte ekainaren 18tik 24ra. Atsegin dut gehien jasotzen dituenak irabaziko du lehiaketa. Sari bakarra emango dute: nekazal turismo baterako gau bat bi lagunentzat.
Ekainaren 26an Antioko jatetxean egingo duten bazkariarekin emango diete amaiera urteurrenaren ospakizunei. Bazkarira Goierriko ESIan gaur egun lan egiten dutenak nahiz 30 urte hauetan han lan egin duten guztiak gonbidatu dituzte. Antolatzaileek oroitzapenerako eta adiskidetasunerako eguna izatea nahi dute. Bazkarirako izen-ematea zabalik egongo da ekainaren 14ra arte. Izena emateko 28 euro ordaindu beharko dira bazkariko; kontu korronte bat ireki dute aurrez dirua sartzeko. Bazkarirako hitzordua 15:00etan egin dute.
