Igande honetan Zumarragako Euskadi plazako arkupeetan egingo dute azoka Made in Urola taldeko artisauek. Guztira 23 parte hartzailek jarriko dute postua. 10:00etan irekiko dute azoka, eta 15:00 aldera arte izango da produktuak ikusi eta erosteko aukera. Aixa Vizuete herriko idazlea ere azokan izango da bere azken eleberria saltzen: Lirio de sangre.
Azokan bertan, haurrentzako tailerra ere izango da. Lucia Alvarezek emango du gozogintza tailerra, Irina Tartarova izenarekin ezagunagoa. Haurrek cupcake famatuak egiten ikasiko dute bertan, eta apur bat dastatzeko aukera ere izango dute. 11:00etatik aurrera izango da.
Bestalde, azokan erosketak egiten dituztenen artean zozketa bat egingo dute. Gastatutako hamar euroko, bale bat emango diete erosleei, eta bale horrekin parte hartuko dute zozketan. Artisau produktuz osatutako saskia izango da saria.
Kontsumo jasangarria helburu
Zumarraga, Urretxu, Legazpi, Ezkio-Itsaso eta Gabiriako artisauak biltzen ditu taldeak. Dena den, ez da talde itxi bat. Herri horietako edozein artisauk parte har dezake Made in Urola taldeak antolatzen dituen azoketan. Baldintza bakarra taldearen izenak berak adierazten duena da: salduko diren produktuak bertan eginak izatea.
Helburu garbia du hasieratik Made in Urola taldeak: kontsumo jasangarria bultzatzea. «Kontsumo jasangarriak esan nahi du dirua gure inguruan mugitzea, eta, ondorioz, aberastasuna bertan geratzea», adierazi du Maider Ulli artisauak. Horrez gain, bertako artisauen lana kalera atera eta jendeari ezagutzera ematea da azoka hauen helburua. «Jendeak ikus dezala hemen ere gauza asko egiten direla, politak eta kalitatezkoak».
Jendearen harrera ona
Ulliren esanetan, jendeak oso harrera ona egin die orain arte antolatutako azokei. «Asko harritu ere egiten dira hemen bertan nolako produktuak ekoizten diren ikusita». Batez ere Gabonetako azokak oso ondo funtzionatzen duela adierazi du, «nahiz eta jendea gutxiago ordaintzera ohituta dagoen». Gabonetako azokan, gainera, literatura eta musika ere izaten dira.
Bertakoak izateak ere laguntzen du Ulliren hitzetan. «Azken finean denek ezagunen bat dute azokan, eta horrek ere laguntzen du jendea azokara etortzera animatzeko, eta saltzeko». Aurrera begira taldeari gustatuko litzaioke azoka Goierri garaiko beste herrietan ere egitea, esaterako, Ezkio-Itsason edo Gabirian. «Noski, herri horietan egitekotan txikiagoa beharko luke azokak, baina polita izango litzateke».
