Igandean, 10:30etik aurrera, Zumarragako herri lasterketaren 11. edizioa egingo dute Euskadi plazan. Proba hau Atletas Populares de Argixao taldeak antolatzen du eta adin guztietako korrikalariek parte har dezakete. 10:30ean eskola-umeen lasterketak hasiko dira. Minibenjamin mailakoek herriko plazari itzuli bat emango diote (200 metro) eta benjaminek bi itzuli emango dituzte. Kimuek itzuli handi bat osatuko dute (800 metro) eta haur mailakoek bi itzuli handi. 11:00etan atleta herrikoien eta 16 urtetik gorako federatuen txanda izango da. Hauek zirkuitu bati bi itzuli emango dizkiote: 5.000 metro.
Korrikalariek egunean bertan eman ahal izango dute izena. Izen-ematea lasterketa hasi baino ordu erdi lehenago itxiko da. Helduek 5 euro ordaindu behar dute eta eskola-umeentzat doan izango da. 120 bat haurrek eta 100 bat helduk parte hartzea espero dute. Maila bakoitzeko hiru lehenengoentzat sariak egongo dira. Gainera, parte hartzaile guztiek oroigarri bat jasoko dute. Lasterketaren amaieran jana eta edana egongo dira guztientzat eta Ispilla kiroldegian dutxatzeko aukera edukiko dute.
Aurreko edizioa duela bi urte izan zen. Mouloud Zouinat nagusitu zen. Bigarren postua Juanjo Igartzabal zumarragarrak eskuratu zuen eta hirugarrena Ruben Lanz legazpiarrak. Lehenengo emakumezkoa Izaro Rubio ordiziarra izan zen. Hau da antolatzaileek urtean zehar antolatzen duten herri lasterketa bakarra. Atletas Populares de Argixao taldeak antolatzen dituen gainontzeko probak eskola kirolekoak dira. Talde honek 56 kide ditu eta gehienak korrikalariak dira. Distantzia guztietako probetan parte hartzen dute.
Herri lasterketa hau ez da Zumarragan egunotarako antolatu duten kirol proba bakarra. Gaur eta bihar paleta txapelketako azken partidak jokatuko dituzte. Gaur hirugarren posturako jokatuko dute, 20:00etan. Bihar finala jokatuko dute, 19:30ean. Bestalde, igandean Galeperra elkartearen plater-tiroketa izango da: 15:30ean Oñatiko tiro zelaian.
