Gorka Hermosa akordeoilari urretxuarrak Hego Amerikan bira egingo du abuztuan. Brasil, Argentina, Uruguai eta Txilen kontzertuak eta eskolak emango ditu.
Bira abuztuaren 1ean hasiko du, Brasilgo Porto Alegre hirian. Ondoren, Argentinako San Jorgen eta Paranan eta Uruguaiko Salton, Paso de los Torosen eta Duraznon joko du. Handik Argentinara itzuliko da. Buenos Airesen, tangoaren hiriburuan, hitzaldia eta kontzertua emango ditu. Aipatzekoa da Hermosa tango zale amorratua dela eta 2006an Tangosophy diskoa kaleratu zuela. Azken kontzertuak Txilen emango ditu: Villa Alemanan, Osornon eta Santiagon.
Hermosaren abestiak munduko akordeoilari onenek jotzen dituzte eta azken urteotan Unescoren eta Nazioarteko Akordeoilari Elkartearen sariak jaso ditu. Urretxuarrak Europako herrialde gehienetan eta Txinan kontzertuak eman ditu.
Lau disko eta lau liburu Gainera, lau disko kaleratu ditu eta 30 bat diskotan parte hartu du. Akordeoiaren historiari buruzko lau liburu idatzi ditu eta musikari oso ezagunekin jo du: Paquito D’Rivera, Ara Malikian, Luis Auseron, La Mari, Carmen Paris, Maria Berasarte, Iñaki Salvador, Malevaje, Maria Berasarte…
