Aurten ere Goierri garaiko udalerriek Europako Mugikortasun Astearekin bat egin dute. Helburuetako bat bizikletaren erabilera bultzatzea da eta horretarako Eskerrik asko bizibiltzeagatik kanpaina antolatu dute. Asteartera arte, bizikleta egunerokoan erabiltzen dutenek saria jasotzeko aukera dute.
Kale dinamizatzaile batek pegatinak eta fruitu lehorrak ematen dizkie bizikletan ikusten dituenei. Ekimen honen helburua eguneroko joan-etorrietan (erosketak egiteko, lanera edo ikastera joateko…) bizikleta erabiltzen duten pertsonak saritzea da. Aldi berean, herritarrak bizikletaren onuraz sentsibilizatzea du helburu. Onurak asko dira: osasuna hobetzea eta praktikotasuna (aparkatzeko arazorik ez, garraiobide azkarra da…). Kanpaina hau Goierri garaiko udalek eta Uggasa garapen agentziak antolatu dute.
Bizikleta erabiltzeak saria du, beraz. Hala, geroz eta gehiago dira bizikleta erabiltzen duten bizilagunak. Osasunarentzat eta ingurumenarentzat onuragarria dela konturatu direlako, azken urteetan sentsibilizazio kanpainak egin direlako eta bidegorriak eraiki direlako.
Ahal duen guztietan bizikleta erabiltzen duenetako bat, Inma Hernandez Legazpiko Udaleko Ingurumen teknikaria da. «Bizikleta erabiltzea oso erosoa da. Mugikortasun Astea dela baliaturik, jendeak proba egin beharko luke. Balia dezatela aste hau autoa alde batera utzi eta beste modu batera mugitzeko», aipatu du legazpiarrak.
Hernandezek bizikletan ibiltzea «gozamena» dela dio. «Askoz ere erlaxatuagoa iristen naiz toki guztietara. Zumarraga edo Urretxun bilera bat dudan bakoitzean, bizikleta hartzen dut. Autoa erabiltzen nuenean baino lasaiago heltzen naiz. Gainera, ez dago aparkalekua bilatu beharrik. Autoarekin denbora asko galtzen da aparkaleku bila», azaldu du.
Joserra Agirre urretxuarra iritzi berekoa da. Duela 30 bat urte hasi zen bizikleta garraiobide bezala erabiltzen, Gasteizen ikasten zuenean. Egun, lanera joateko erabiltzen du. «Lehen oinez joaten nintzen eta euria egiten zuenean autoz. 900 metro egiteko autoa hartzea ez zela fundamentua pentsatu nuen eta bizikleta erabiltzen hasi nintzen. Euriarekin eta elurrarekin ere bizikletaz joaten naiz. Euritako prakak jartzen ditut eta aterkia ere erabili izan dut». Merezi duela oso argi du. «Autoan baino lehenago heltzen naiz eta ez dut kutsatzen. Gainera, autoak lehen kilometroetan kutsatzen du gehien eta bidaia oso motzak egitea txarra da autoarentzat».
Uggasak bizikletan ibiltzen ikasteko ikastaroak eman ditu eta horri esker ere erabiltzaile gehiago daude. Ikastaroan parte hartu zutenek ere Europako Mugikortasun Astearekin bat egingo dute: bizikletan ibiltzeko elkartuko dira. «Horrelako ikastaro gehiago antolatzeko asmoa dugu. Hori dela eta, zein hobekuntza egingo lituzketen galdetu genien. Bizikletan ibiltzeko gelditzea ondo egongo zela esan ziguten eta hori egingo dugu», azaldu du Josune Makaia teknikariak.
Irteeraren helburua bizikleta eguneroko lanak egiteko oso baliagarria dela erakustea da. «Kalera bizikletarekin aterako gara eta kafetxo bat hartuko dugu. Ondoren, enkarguak egingo ditugu. Kafetxoan, errepideko segurtasunari buruz hitz egingo dugu. Gainera, erosketak nola eraman eta bizikleta giltzarrapoarekin nola lotu azalduko dugu».
Uggasak antolatu dituen bi ekimen hauez gain, Legazpiko Udalak bereak antolatu ditu. Asteartera arte herriko auzoak lotzen dituen Junetorri autobusa doan izango da. Helburua legazpiarrek autobus hau probatzea eta autoa erabiltzeari uztea da.
Legazpiarrek bizikleta martxa ere antolatu dute. Datorren asteartean egingo dute, 18:30ean. Laubide kalean elkartuko dira eta Euskal Herria plazan bukatuko den ibilbide bat egingo dute. Txikienak Txorronea parean elkartuko dira gainontzeko txirrindulariekin, handik zuzenean plazara joateko.
Martxa honen helburua bizikleta eguneroko ibilbideetarako oso egokia dela aldarrikatzea da. Ekitaldia adin guztietako herritarrei zuzendua dago: helduak, gazteak eta haurrak. Abiadura mugatuta egongo da (10 kilometro orduko) eta parte hartzaile guztiek kaskoa eraman behar dute. Amaieran ogitartekoak eta fruta banatuko dituzte txirrindularien artean.
